Sinod Biełaruskaj pravasłaŭnaj carkvy ŭchvaliŭ rašeńnie Archirejskaj rady Minskaj mitrapolii ab tym, što treba pryniać adzinuju formu nazvy prychodaŭ i manastyroŭ.
Pra heta havorycca ŭ časopisach pasiadžeńnia Sinoda BPC, jakija apublikavanyja na aficyjnym sajcie Biełaruskaha Ekzarchata.
U časopisach tłumačycca, što ŭ suviazi z utvareńniem novych jeparchij Minskaj mitrapolii ŭ bližejšy čas treba budzie ažyćciavić dziaržaŭnuju pierarehistracyju statutaŭ prychodaŭ i manastyroŭ.
«Niekatoryja manastyry i prychody byli zarehistravanyja z prystaŭkaj «Śviata» («Śviata-Nikolski», «Śviata-Uśpienski» i h.d.), a niekatoryja — z najmieńniem biez prystaŭki («Nikolski» ci «Uśpienski»). Hetyja roznačytańni vyklikajuć u ludziej pytańni nakštałt: «Niaŭžo jość śviatyja i nie śviatyja chramy?» — havorycca ŭ dakumiencie.
U vyniku jany buduć nazyvacca biez hetaj prystaŭki.
Taksama sinod, u pryvatnaści, vyrašyŭ, što Śviata-Dabravieščanski Ladzienski mužčynski manastyr u vioscy Małyja Lady Smalavickaha rajona Minskaj vobłaści ŭ dalejšym treba nazyvać: «Ladzienski mužčynski manastyr u honar Dabravieščańnia Praśviatoj Baharodzicy vioski Małyja Lady Smalavickaha rajona Barysaŭskaj jeparchii Biełaruskaj pravasłaŭnaj carkvy».
Jepiskapy, jakija kirujuć niadaŭna ŭtvoranymi ŭ Minskaj vobłaści jeparchijami, zrobiać zachady dla svoječasovaj pierarehistracyi parafij. Taksama ŭ časopisach tłumačycca, što paśviedčańni ab dziaržrehistracyi hetych jeparchij (Barysaŭskaj, Słuckaj i Maładziečanskaj) byli ŭručany jepiskapam 8 krasavika 2015 hoda.
Sinod vyrašyŭ taksama źmianić skład Carkoŭnaha suda BPC.
