Supracoŭniki milicyi Minskaj vobłaści zatrymali roźničnych handlaroŭ nasvajem i pierakryli aptovy kanał jaho pastaŭki ŭ Minsk.
Jak paviedamlaje UUS Minabłvykankama, niekatory čas tamu ŭ pole zroku supracoŭnikaŭ apieratyŭna-pošukavaha adździeła trapiŭ 27-hadovy žychar stalicy, jaki arhanizavaŭ u Minsku pastaŭku i padpolny roźničny prodaž niekurylnaha tytuniovaha rečyva nasvaj. Apieratyŭniki UUS sumiesna z supracoŭnikami padatkovaj inśpiekcyi pa Maskoŭskim rajonie Minska praviali «kantrolnuju zakupku» i zatrymali pradaŭca.
Pry im było znojdziena 156 pakiecikaŭ z rasfasavanym nasvajem ahulnaj vahoj bolš za 6 kh. Pry dalejšaj adpracoŭcy kantaktaŭ zatrymanaha byŭ ustanoŭleny jaho 37-hadovy saŭdzielnik, jaki na zdymnaj kvatery pa vulicy Jasienina zachoŭvaŭ aptovuju partyju nierazbaŭlenaha i nierasfasavanaha nasvaja ahulnaj vahoj 19,3 kh.
U vypadku prodažu ŭsioj partyi handlary mahli atrymać dachod bolš za 30 młn. rubloŭ.
Pavodle słoŭ samich zatrymanych, kanfiskavanaja partyja była b imi realizavanaja mienš čym za tydzień. Pavodle apieratyŭnaj infarmacyi, handlary zakazvali nasvaj optam u Rasii, raspłačvajučysia praz zašyfravanyja elektronnyja kašalki, a tavar atrymlivali praz pasrednikaŭ, jakija navat nie viedali ab tym, što mienavita jana pieradajuć (nibyta pieradačy dla svajakoŭ).
U dačynieńni da zatrymanych IMPZ pa Maskoŭskim rajonie Minska składzienyja pratakoły pa č. 2 art. 12.7 KoAP (niezakonnaja pradprymalnickaja dziejnaść). Materyjały pieradadzienyja ŭ sud Maskoŭskaha rajona dla pryniaćcia rašeńnia.
