«Dziejańni ŭładaŭ u dačynieńni da Alaksandra Kazulina nie tolki antyhumannyja, ale i supraćzakonnyja», — tak prakamienciravaŭ były advakat źniavolenaha palityka juryst Ihar Rynkievič u intervju BiełaPAN apošnija zajavy administracyi kałonii «Vićba-3».
Nahadajem, što ranicaj 25 lutaha načalnik kałonii Vitalij Ahnistykaŭ paviedamiŭ pradstaŭniku Biełaruskaha Chielsinkskaha kamiteta pa Viciebskaj vobłaści Paŭłu Levinavu, što rychtuje admovu A.Kazulinu ŭ vyjeździe na pachavańnie žonki. Hetaje rašeńnie jon matyvavaŭ tym, što za čas znachodžańnia ŭ kałonii Kazulin mieŭ čatyry dyscyplinarnyja spahnańni i z ulikam asoby źniavolenaha nie ŭjaŭlajecca mahčymym adpuścić jaho na pachavańnie žonki.
«Uściešna, što paśla zakančeńnia dvuch sutak Ahnistykaŭ pryznaŭ, što klučavaja rola ŭ vyrašeńni ab pradastaŭleńni Kazulinu karotkaterminovaha vodpusku ŭsio-taki naležyć jamu. Raniej jon zajaŭlaŭ, što takoje rašeńnie pavinna prymacca departamientam vykanańnia pakarańniaŭ», — nahadaŭ I.Rynkievič.
«Što ž da čatyroch dyscyplinarnych spahnańniaŭ, to jašče zusim niadaŭna ich było try, dva ź jakich — za toje, što Kazulin (čałaviek, jaki dahetul kančatkova nie adnaviŭsia paśla 53-dzionnaj palityčnaj haładoŭki) pryloh na łožak u pazaŭročny čas. Niečakanaje źjaŭleńnie jašče adnaho spahnańnia śviedčyć ab tym, što na Kazulina viadziecca cisk unutry kałonii», — ličyć I.Rynkievič.
Juryst taksama prakamienciravaŭ słovy načalnika adździeła pa nahladu za vykanańniem pakarańnia Viciebskaj abłasnoj prakuratury Juryja Ramanoŭskaha, jaki 25 lutaha ŭ intervju ahienctvu Interfaks-Zachad zajaviŭ, što Kazulin nie pisaŭ zajavu z prośbaj adpuścić jaho z papraŭčaj kałonii na pachavańnie žonki.
«Zhodna z zakanadaŭstvam, słužbovyja asoby (u hetym vypadku pradstaŭniki administracyi kałonii) pavinny rastłumačyć źniavolenamu, što ad jaho patrabujecca ŭ toj ci inšaj situacyi. Zajava z prośbaj adpuścić Kazulina na pachavańnie žonki pastupiła ad jaho svajakoŭ. I kali nieabchodna była jašče zajava ad jaho samoha, dyk heta jamu pavinny byli rastłumačyć, a nie radasna «pacirać ruki» ad taho, što čałaviek nie viedaŭ niejkich pracesualnych detalej», — skazaŭ Rynkievič.
Jon zajaviŭ, što svajaki i paplečniki A.Kazulina buduć «abskardžvać antyzakonnyja dziejańni kiraŭnictva kałonii».
