Repietycyja cyrymonii losavańnia, ria.ru
Užo ŭ hetu subotu, 25 lipienia, u Sankt-Pieciarburhu, u Kanstancinaŭskim pałacy, projdzie cyrymonija papiaredniaha losavańnia čempijanatu śvietu pa futbole — 2018 h., jaki adbudziecca ŭ Rasii. Papiaredniaje losavańnie — heta farmavańnie adboračnych hrupaŭ.
Losavańnie projdzie dla Jeŭropy, Afryki, Akijanii, a taksama Paŭnočnaj i Centralnaj Amieryk. Adboračny turnir u Azii ŭžo startavaŭ. A Paŭdniovaja Amieryka, jak viadoma, na adboračnyja hrupy nie raźbivajecca, a pravodzić ahulny turnir, jaki vyznačaje čatyroch ščaśliŭčykaŭ.
Vieści cyrymoniju losavańnia (a pačniecca jana ŭ subotu a 18-j) buduć viadomaja madel Natalla Vadzianava i televiadučy, biełarus Dźmitryj Šepieleŭ, paviedamlaje lenta.ru. Miarkujecca, što ŭdzieł u losavańni voźmie i Uładzimir Pucin.
Što da asablivaściaŭ adboračnaha turniru ŭ Jeŭropie,
Fifa.com nahadvaje, što ŭ im u jeŭrapiejskaj zonie prymuć udzieł 52 nacyjanalnyja fiederacyi. Buduć sfarmiravany siem hrupaŭ pa šeść kamandaŭ i dźvie hrupy pa piać kamandaŭ. Hulni projduć z 4 vieraśnia 2016 h. pa 10 kastryčnika 2017 hoda. Dzieviać pieramožcaŭ hrup traplajuć na ČS-2018 naŭprost. Vosiem najlepšych zbornych siarod kamandaŭ, jakija zaniali druhija miescy ŭ svaich hrupach, praviaduć stykavyja matčy ŭ listapadzie 2017 hoda.
Nahadajem, što košyki dla losavańnia byli sfarmavanyja paśla publikacyi lipieńskaha rejtynhu FIFA. Zbornaja Biełarusi trapiła ŭ piaty košyk (u jaje 100-je miescy ŭ rejtynhu).
Pieršy košyk: Hiermanija, Bielhija, Hałandyja, Partuhalija, Rumynija, Anhlija, Uels, Ispanija, Charvatyja.
Druhi košyk: Słavakija, Aŭstryja, Italija, Šviejcaryja, Čechija, Francyja, Isłandyja, Danija, Bośnija i Hiercahavina.
Treci košyk: Ukraina, Šatłandyja, Polšča, Vienhryja, Šviecyja, Ałbanija, Paŭnočnaja Irłandyja, Sierbija, Hrecyja.
Čaćviorty košyk: Turcyja, Słavienija, Izrail, Irłandyja, Narviehija, Bałharyja, Farerskija vyspy, Čarnahoryja, Estonija.
Piaty košyk: Kipr, Łatvija, Armienija, Finlandyja, Biełaruś, Makiedonija, Azierbajdžan, Litva, Małdova.
Šosty košyk: Kazachstan, Luksiemburh, Lichtenštejn, Hruzija, Malta, San-Maryna, Andora.
U adboračnuju hrupu traplaje pa adnoj kamandzie z kožnaha košyka.
