Kamitet dziaržaŭnaha kantrolu Homielskaj vobłaści pravieryŭ AAT «Biełaruski mietałurhičny zavod» — kirujučaja kampanija chołdynhu «Biełaruskaja mietałurhičnaja kampanija» (AAT «BMZ») i ŭstanaviŭ fakty parušeńnia pradpryjemstvam paradku vykarystańnia paliŭna-enierhietyčnych resursaŭ, a taksama nieefiektyŭnaha vykarystańnia ŭłasnych srodkaŭ na realizacyju inviestycyjnych prajektaŭ.
Jak paviedamlaje pres-słužba KDK Homielskaj vobłaści, AAT «BMZ» nieefiektyŭna vykarystała bolš za 200 młrd rubloŭ ułasnych srodkaŭ, zatračanych u 2012 hodzie na zakupku abstalavańnia dla realizacyi prajekta «Kompleksnaja rekanstrukcyja pyłahazaŭłoŭlivajučaj ustanoŭki (PHU-1)». Abstalavańnie da hetaha času nie vyjšła na prajektnyja paramietry pa ačystcy dymavych hazaŭ ad duhavoj elektrastalepłavilnaj piečy (DSP-1).
Taksama ŭ 2012—2013 hadach AAT «BMZ» z parušeńniem narmatyŭnych pravavych aktaŭ ažyćciaŭlała vytvorčaść asobnych vidaŭ pradukcyi biez zaćvierdžanych va ŭstanoŭlenym paradku norm raschodu elektraenierhii na jaje vytvorčaść.
Akramia taho, u 2012 hodzie i studzieni—mai 2015 hoda pradpryjemstva dapuściła straty ciepłavoj enierhii ŭ mahistralnych ciepłavych sietkach.
Taksama AAT «BMZ» zavysiła bolš čym na 6 młrd. rubloŭ košt stvareńnia vytvorčaści sartavoha prakatu i budaŭnictva drobnasortna-drotavaha stanu ŭ vyniku pryjomki i apłaty faktyčna nie vykananych rabot, a taksama rabot i zatrat, nie praduhledžanych prajektna-kaštarysnaj dakumientacyjaj. Paśla ŭmiašańnia KDK hetyja sumy byli vyklučany z koštu budaŭnictva i viernuty na raźlikovyja rachunki AAT «BMZ».
Pa vynikach pravierki KDK vobłaści razhledzieŭ pytańnie ab pryciahnieńni AAT «BMZ» i jaho słužbovych asob da administracyjnaj adkaznaści.
