U siońniašniaj Biełaruskaj pravasłaŭnaj carkvie jość dva łahiery. «Adzin – źviazany z «rasiejskim śvietam», schilny da administracyjnych mietadaŭ, ksienafobii, časam da šavinizmu. I druhaja častka — śvietłaja, achilenaja toj bieł-čyrvona-biełaj stužkaj», — miarkuje sustaršynia arhkamitetu pa stvareńni partyi «Biełaruskaja chryścijanskaja demakratyja» Pavieł Sieviaryniec.
«Biełaruskaje pravasłaŭje nielha addavać Maskvie i čarnasociencam! Bo razam addadzim Jefrasińniu Połackuju, Kanstancina Astrožskaha, Kiryłu Turaŭskaha», — adznačyŭ jon u intervju Radyjo Racyja.
Pry hetym palityk ličyć pahrozu z boku «ruskaha śvietu» nadzvyčaj surjoznaj. «U luby momant zvyčajnyja hopniki z rajona albo maładziony, što chodziać u trenažornyja zali, dyj navat tyja, što siadziać kala kampjutara, mohuć pieratvarycca ŭ sapraŭdnych «zombi». Ich my ŭžo ŭbačyli i ŭ Krymie, i ŭ Daniecku, i ŭ «Isłamskaj dziaržavie». Pieraviarnuć, pavodle sučasnych psicha-technałohij, śviadomaść, asabliva va ŭzroście staleńnia, całkam mahčyma. Tamu jość i maładyja biełarusy, što spaviadajuć ideałohiju nianaviści da Zachadu, habrejaŭ, biełaruskaha Adradžeńnia, inšaviercaŭ. I heta jość prajavy «čarnasocienstva»», — miarkuje jon.
«Pryncypova važna, što viadzie pamianionych «admysłoŭcaŭ» nie «luboŭ da Rasiei», idej, što niasuć rasiejskaja kłasičnaja litaratura ci muzyka – a samaśćviardžeńnie siabie šlacham prynižeńnia inšych, pry čym radykalnaha, što nie spynicca pierad uzbrojenym źniščeńniem «voraha»! Heta toje žachlivaje, što natchniała Hitlera, a siońnia mnohich «dobraachvotnikaŭ», što jeduć na Danbas i viartajucca časam u cynkavych trunach. Biełarusam čužaja vajna nie na ich terytoryi i čarhovy hienacyd suprać sabie – niepatrebnyja!» – zajaviŭ sustaršynia BCHD.
