 Alaksandar Kazulin |
U zajavie Dziarždepartamentu ZŠA vykazvajucca spadziavańni na daterminovy i kančatkovy vychad na volu Alaksandra Kazulina, a taksama spačuvańni ŭ suviazi sa śmierciu jaho žonki Iryny.
Jak zajaviŭ presavy sakratar amerykanskaha dziarždepartamentu Tom Kiejsi, «vielmi važna, kab vyzvaleńnie Kazulina było kančatkovym». Kali ž palitviaźnia vyzvalać daterminova, to «ZŠA buduć hatovyja pačać dyjaloh ź Biełaruśsiu adnosna dalejšych krokaŭ pa palapšeńni dvuchbakovaha supracoŭnictva»
Ad imia Dziarždepartamentu ZŠA Tom Kiejsi taksama vykazaŭ škadavańnie, što Alaksandar Kazulin apynuŭsia na voli tolki paśla śmierci jahonaj žonki Iryny.
Jak paviedamili «Svabodzie» u presavych słužbach Eŭrakamisii i Eŭraparlamentu, za sytuacyjaj, jakaja adbyvajecca ŭ Miensku, uvažliva sačyć i Eŭraźviaz.
«Narmalnuju čałaviečnaść» biełaruskich uładaŭ», to bok rašeńnie ab dazvole Kazulinu prysutničać na pachavańni jahonaj žonki pavitaŭ i ministar zamiežnych spraŭ Niamieččyny Frank‑Valter Štajnmajer. Pry hetym Štajnmajer zaznačyŭ, što «tolki vyzvaleńnie ŭsich palitviaźniaŭ moža razhladacca ŭ jakaści pieradumovy ŭ spravie pakrokavaha adnaŭleńnia stasunkaŭ pamiž Biełaruśsiu i Eŭraźviazam». Štajnmajer padkreśliŭ. što paŭnavartasnaha supracoŭnictva z Eŭropaj Biełaruś moža dasiahnuć « na asnovie eŭrapiejskich kaštoŭnaściaŭ, demakratyi i pryncypu pravavoj dziaržavy».
Biezumoŭnaha vyzvaleńnia Alaksandra Kazulina patrabavali siabry Kamitetu pa mižnarodnych spravach Eŭraparlamentu na čale z staršyniom Jacekam Saryjušam — Volskim. Jany, adnak, nazvali aburalnym i antyhumannym toje, što ciaham dvuch dzion paśla śmierci žonki Kazulinu nie dazvalali adbyć na pachavańnie.
Pavodle deputata Eŭraparlamentu Bernda Poselta, Eŭraźviazu vielmi chaciełasia b spadziavacca na chutkaje vyzvaleńnie «apošniaha biełaruskaha palitviaźnia».
«Adnak, dzie harantyja, što na nastupny tydzień paśla hetaha vyzvaleńnia ŭ Biełarusi nia buduć aryštavanyja ci zatrymanyja novyja ludzi?» ‑pytajecca Poselt.
Jak ličyć eŭrapiejski palityk, harantyju taho, što «biełaruski hramadzianin nia budzie pakarany za svaje palityčnyja pierakanańni» mohuć dać «tolki hruntoŭnyja źmieny ŭ ahulnaj biełaruskaj sytuacyi».
