Prezident Ukrainy Piatro Parašenka padpisaŭ zakon ab nacyjanalnaj palicyi, jakaja zamienić isnujučuju milicyju, paviedamlajecca ŭ «Tvitary» kiraŭnika dziaržavy.
@APUkraine
Viarchoŭnaja Rada pryniała zakon ab palicyi 2 lipienia. U dakumiencie, u pryvatnaści, havorycca, što palicyja achoŭvaje pravy i svabody čałavieka, zmahajecca sa złačynnaściu i padtrymlivaje hramadskuju biaśpieku.
Palicyjantam zabaroniena vykazvać asabistaje staŭleńnie da dziejnaści palityčnych partyj padčas vykanańnia słužbovych paŭnamoctvaŭ, a taksama vykarystoŭvać słužbovyja paŭnamoctvy ŭ palityčnych metach.
Palicyja, jak praduhledžana ŭ zakonie, uvojdzie ŭ strukturu ministerstva ŭnutranych spraŭ Ukrainy.
Pieršaja źmiena patrulnaj palicyi Kijeva prystupiła da vykanańnia svaich abaviazkaŭ u pačatku lipienia, paśla pryniaćcia zakona Radaj.
Jak zajaviła tady pieršy namieśnik ministra ŭnutranych spraŭ Ukrainy Kaciaryna Zhuładze, da padpisańnia prezidentam zakona ab nacyjanalnaj palicyi patruli dziejničajuć u testavym režymie.
Parašenka nazvaŭ stvareńnie patrulnaj palicyi adnoj z samych maštabnych reformaŭ va Ukrainie.
U składzie Nacyjanalnaj palicyi, akramia patrulnaj, buduć funkcyjanavać padraździaleńni kryminalnaj i śpiecyjalnaj palicyi, palicyja achovy i palicyja asablivaha pryznačeńnia.