Śpiavačka, uradženka Jekaciarynburha Julija Čyčeryna ŭ intervju kanału LifeNews krytyčna vykazałasia pra muzyku, lidara rok-hurtu «Mašyna času» Andreja Makareviča.
Asnoŭnaj temaj intervju staŭ biahučy padzieł muzykaŭ pa palityčnych pierakanańniach i pa ŭkrainskim pytańni. Makareviča, padvierhnutaha hanieńniu za kancerty va ŭkrainskim Słaviansku, Čyčeryna nazvała starym i durnym. «Mnie jaho škada. Nie daj boh nikomu takoha pad staraść hadoŭ. Prosta jamu niejki saŭkovy honar nieprahinańnia pad śviet nie dazvalaje spynicca i zrazumieć: što ž ty robiš, Andruša. Dy i boh ź im. Moža, adumajecca», - skazała śpiavačka.
Sama Čyčeryna dała niekalki kancertaŭ u Danieckaj i Łuhanskaj «narodnych respublikach». Akramia taho, śpiavačka vystupała na kancercie ŭ Maskvie padčas akcyi «Antimajdan»
21 lutaha, čym vyklikała krytyku z boku libieralna nastrojenych kalehaŭ. U pryvatnaści, były pradziusar «Našaha radyjo» Michaił Kozyraŭ, jaki kaliści jaki dapamahaŭ Čačerynaj z «raskrutkaj», napisaŭ na svajoj staroncy ŭ fejsbuku: «Nie pasyłajcie mnie paproki ŭ tym, što ja dapamahaŭ hetaj artystcy. Nikoli nie viedaješ, kali łopnie skura i z čałavieka vyłupicca zubasty śliniavy «čužy». Za pieśniu «Moj rok-n-roł» tolki kryŭdna … ».
U intervju LifeNews Čyčeryna prakamientavała abvinavačvańni ŭ zdradzie rok-n-rołu. «Pa-mojmu, być zdradnikam Radzimy horš, čym zdradnikam niejkaha tam rok-n-rołu».
Nahadajem, dla rasijskich kulturnych dziejačaŭ padtrymka Ukrainy moža abiarnucca niepryjemnaściami. Paśla vystupu Makareviča ŭ Słaviansku, byli admienienyja kancerty muzykanta ŭ šerahu rasijskich haradoŭ, u tym liku i ŭ Jekaciarynburhu.
Śpiavačka Ziemfira ŭ pačatku lipienia padčas svajho vystupu ŭ Tbilisi razharnuła na scenie ściah Ukrainy, jaki joj pieradali z zały. Paśla hetaha artystka stała abjektam napadak z boku kalehaŭ, jaje kancerty ŭ Krymie i Sankt-Pieciarburhu byli admienienyja. Akramia taho, paśla vystupu ŭ Tbilisi na Ziemfiru padaŭ zajavu ŭ palicyju žychar Rastoŭskaj vobłaści. Ziemfira nibyta abraziła jaho padčas kancertu ŭ kastryčniku 2013 hoda. Ciapier vyrašajecca pytańnie ab uzbudžeńni kryminalnaj spravy ab chulihanstvie.
Rok-muzyka Barys Hrabienščykoŭ niadaŭna sustreŭsia z hubiernataram Adeskaj vobłaści Michaiłam Saakašvili. Deputat Dziarždumy RF, člen kamiteta pa abaronie Alaksiej Žuraŭloŭ nazvaŭ ŭčynak Hrabienščykova «zdradaj» i zajaviŭ, što takija, jak Hrabienščykoŭ, «buduć vykraśleny z historyi RF».
