Daśledčyki Kiembrydžskaha ŭniviersiteta (ZŠA) i Šviejcarskaj vyšejšaj technałahičnaj škoły Ciurycha stvaryli robata, što moža stvarać inšych robataŭ, palapšać ich dy vučycca na svaich pamyłkach. Technałohija apisvajecca na sajcie Kiembrydža.
«Robat-matula» (pakul što?) nie raspracoŭvaje inšych robataŭ z nula, a źbiraje «dzietak» z modulaŭ, zatym abiraje samaje prystasavanaje «dziciatka» — i robić nastupnaje pakaleńnie z ulikam «pamyłak».
«Matula» pakul nie moža skapijavać siabie ci stvaryć niešta bolš efiektyŭnaje za siabie.
Moduli «dzietak» majuć «hienietyčny kod» — apisańnie formy robata i kamand dla jaho matora. Nastupnyja pakaleńni stvarajucca z vypadkovymi źmienami ŭ hetym kodzie — časam karysnymi, časam škodnymi. Takim ža čynam adbyvaŭsia i naturalny adbor u pryrodzie. Kryteram karysnaści jość chutkaść pieramiaščeńnia «dzietak» — u «matuli» atrymałasia pavialičyć chutkaść praź niekalki pakaleńniaŭ.
Na siońnia «robat-matula» tracić na adno «dziciatka» hadzinu i nie moža pracavać dolej za 24 hadziny. Ale aŭtary robata płanujuć palepšyć technałohiju, kab ukaranić jaje ŭ pramysłovaści. Jany spadziajucca, što mašyna stanie vynachodnikam i dapamoža prystasoŭvać robataŭ dla składanych umoŭ.
Robaty, što stvarajuć inšych robataŭ, niaredka apisvajucca ŭ navukovaj fantastycy. Jość i davoli niefantastyčny prahnoz: chutka nas čakaje technałahičnaja sinhularnaść, kali my sami pierastaniem razumieć, jak raźvivajucca technałohii.
U navukovaj fantastycy robaty, što robiać robataŭ, redka pryvodziać da aptymistyčnaha scenara. Papularny siužet — «šeraja śliź», kali nanarobaty ŭ namahańniach zrabić sabie padobnych pieratvorać usio dastupnaje rečyva ŭ siabie. Jak składziecca ŭ žyćci, a nie mastackaj litaratury, pradkazać ciažka.
Prynamsi ciapier «robat-matula» nie ŭmieje rabić inšych «robataŭ-matul». Tym nie mieniej, navat «matula», što ŭmieje rabić tolki «dzietak», a nie «matul», moža pryvieści da taho, što «dzietki» stanuć zanadta składanymi dla razumieńnia čałavieka.
Vyjava z sajta abc.net.au
Adna sprava, kali vy nie razumiejecie, jak pracuje vaš iPhone, a zusim inšaja — kali nichto ŭ Apple nie razumieje, jak pracuje ich iPhone i jakoj budzie nastupnaja madel. Taki scenar, što atrymaŭ nazvu «technałahičnaja sinhularnaść», pradkazvaŭsia jašče z XIX stahodździa, staŭ papularnym u siaredzinie XX-ha. Niechta kazaŭ pra nadychod sinhularnaści ŭ 2030-2045 hodzie, niechta navat da 2020-ha.
