U časie sioletniaj štohadovaj cyrymonii ŭhanaravańnia ajčynnych rok-hurtoŭ na scenu vyjšli ci nie ŭsie zabaronienyja koliś vykanaŭcy. Niekalki kryštalovych karonaŭ muzyki atrymali z ruk apalnych piśmieńnikaŭ i mastakoŭ.
Toje, što na Karanacyi vystupiać hurty z «čornaha śpisu», stała viadoma jašče naprykancy studzienia. Adnak, hledziačy pa reakcyi hledačoŭ, šmat chto ź ich da apošniaha nia moh pavieryć u svajo ščaście — vychad na scenu «N.R.M.», čyj lider Lavon Volski šmatznačna pakašlivaŭ u mikrafon, naładžvajučy hitaru, byŭ sustrety chvalaj zachapleńnia. Eneremaŭcy vykanali dźvie pieśni — «Miensk i Minsk» i «Mama,tata — heta ja». Apošniuju tradycyjna — razam ź dzietkami. Zatym viadučyja cyrymonii — muzyki i dy-džei «Eŭraradyjo» Alaksandar Pamidoraŭ dy Maša Łahodzič, pierajšli ŭłasna da abviaščeńnia pieramožcaŭ «Rok-karanacyi 2007». Alaksandar dy Maša ciaham viečaru kolki razoŭ źmianiali stroi — ad strohich da niesurjoznych. Karony i dyplomy na scenu vynosili pryhažuni ŭ sukienkach adna lepš druhoj.
Adkryćciom hodu staŭ hurt «Dzieci dziaciej». Jaho salistka Hanna Chitryk, aktorka Kupałaŭskaha teatru, premiju atrymała z ruk piśmieńnika i mastaka Adama Hlobusa, jaki adpuściŭ śpiavačku da mikrafonu tolki paśla seryi pacałunkaŭ. Vystup «Dziaciej» atrymaŭsia nadzvyčaj emacyjny i byŭ prychilna sustrety publikaj. Na pryz u hetaj katehoryi pretendavali taksama hurty «Indra» i M.L.A.
U naminacyi «Praryŭ hodu» karonu atrymali «Flaŭs i Klajn» z Navapołacku. Chłopcy adznačyli pieramohu nad «Tarpačom», jaki taksama ciaham hodu praryvaŭsia da ŭznaharody, performansam z vyciskańniem pamidoru, skokami i poŭzańniem pa scenie.
Klipam hodu, a taksama najlepšaj pieśniaj hodu aŭtarytetnaje žury pryznała «Kapitał» Lapisa Trubiackoha. Pakolki Siarhiej Michałok i K źjechali na hastroli ŭ Kijeŭ, premiju atrymaŭ režyser klipa Alaksiej Cierachaŭ. Jon ścipła nahadaŭ, što dziesiać hod tamu zrabiŭ klip da pieśni «Lapisaŭ» «Au», tamu jamu vielmi pryjemna, što «praź dziesiać hod jaho narešcie adznačyli». Alaksandar Pamidoraŭ šmatznačna zapytaŭsia ŭ zali, ci ŭsie bačyli ŭznaharodžany klip i ci ŭsie jaho versii.
Vykanaŭcu hodu słuchačy vyznačyli praz sajt «Tuzin Hitoŭ» — im staŭ Lavon Volski, jaki vyjšaŭ na scenu ŭ składzie «Krambambuli» razam z salistkaj Biełdziaržfiłarmonii Ninaj Ciško. Pryz Lavon Volski atrymaŭ ad mastaka Alesia Maračkina. Pamidoraŭ zaŭvažyŭ: «Pakolki vašyja zdymki pačali źnikać z knižak, to choć pahladzim na vas žyŭcom».
Druhuju častku kancertu raspačaŭ «Pałac». Paśla vykanańnia dźviuch kampazycyjaŭ lider hurtu Aleh Chamienka niečakana paprasiŭ zajhrać i treciuju. Ahulnaje adabreńnie zali prymusiła reciravacca viadučych za kulisy. Zatym Aleh Chamienka ŭručyŭ karonu hurtu z Mahilovu «OSIMIRA», jaki pieramoh u naminacyi «Tradycyi i sučasnaść». Zasnavalnik i ŭdzielnik etna-hurta Andrej Paŭłaŭčenia padziakavaŭ Chamienku za honar pieraniać słaŭnyja tradycyi biełaruskaha folku słovami «Dziakuj, tatu».
Rok-kniazioŭnaj stała vakalistka hurtoŭ «Tarpač» i «Zygimont Vaza» Volha Samusik. Jana ščyra pryznałasia, što nia viedała pra isnavańnie takoj naminacyi. Na što Alaksandar Pamidoraŭ patłumačyŭ: «Naminacyju daviałosia viarnuć na «Karanacyju», bo pretendentak na jaje, na ščaście, što razu ŭsio bolš». Publika, adnak, nieadnaznačna pastaviłasia da manery vykanańnia Volhi. Kali taja prapanavała pieśniu dla ŭsich zakachanych «Achviary libida», z zali pačułasia replika z notkami adčaju ŭ hołasie: «A moža nia treba?!».
«Tarpač» na scenie źmianiła «Krama», jakaja sioleta pretendavała adrazu na dźvie naminacyi — albom hodu i pieśnia hodu. U zali paŭstavali ludzi, siarod jakich bahata było mužčynaŭ — adnahodkaŭ Ihara Varaškieviča, jakija badziora tančyli pad pastalełuju na 20 hod «Stefku». Što praŭda, adzin stroha apranuty dziadziečka ŭ pieršym šerahu, jaki praz uvieś kancert nivodnaha razu nie ŭśmichnuŭsia i nie paapładziravaŭ muzykam, uvohule zasnuŭ.
Rasiejski telekanał A-ONE, jaki akurat u lutym adčyniŭ u Miensku svajo pradstaŭnictva, uručyŭ ułasny pryz hurtu «Etna-tryjo Troica». Hienieralny dyrektar telekanału ŭ Biełarusi Aleh Skarabahaty pieradaŭ «Troicy» adpaviedny sertyfikat, jaki harantuje prasoŭvańnie i ščylnuju ratacyju jaho klipu «Try janhały» na telekanale. Da ŭsiaho, mienavita na A-ONE možna budzie pabačyć televersiju cyrymonii «Rok-Karanacyja-2007».
Albom «Kałychanki» hurta «WZ-Orkiestra», zapisany pry padtrymcy dziciačaha fondu AAN UNISEF, staŭ prajektam hodu. U časie atrymańnia premii, kaardynatarka prajektu Julija Laškievič zajaviła, što pryśviačaje hetuju pieramohu pamiaci Iryny Kazulinaj. Hledačy vitali jaje zajavu vopleskami.
A albom «Neuro Dubel» «Stasi» staŭ hałoŭnym albomam hodu. «Dziubieli» vykanali tolki adnu pieśniu, kab adrazu paśla karotkaha sychodu sa sceny viarnucca pa hałoŭny pryz «Karanacyi» — Rok-Karonu (hurt hodu). Piśmieńnik Ŭładzimier Arłoŭ, addajučy Alaksandru Kullinkoviču hałoŭnuju karonu, raspavioŭ daŭniuju historyju pra pryjezd u Połacak Uładzimiera Mulavina ź «Lavonami», kali kancert ansamblu apynuŭsia pad pahrozaj z-za daŭžyni vałasoŭ muzykaŭ: «Ja tady byŭ dziasiaciklaśnikam, słuchaŭ «Bitłoŭ» i «Rolinhaŭ» i skieptyčna staviŭsia da svajho. Na ščaście Mulavin pasłuchaŭsia hałoŭnaha ideolaha i schadziŭ u cyrulniu. Takim čynam uva mnie pračnułasia zusim novaja istota». Uładzimier Arłoŭ padaryŭ lideru «Neuro Dubel» kolki svaich knižak, u jakich byli teksty jak pra «Lavonaŭ», tak i pra Stasi. Na raźvitańnie piśmieńnik padziakavaŭ biełaruskim hurtam, jakija «zdolnyja źmianić da lepšaha cełaje pakaleńnie, doračy maładym pačućcio Svabody».
Alaksandar Kullinkovič, jaki ŭžo druhi raz atrymaŭ hety pryz, ščyra radavaŭsia pieramozie razam z zalaj, jakaja ad pačatku cyrymonii skandavała «Nejra Dziubiel».
Viadoma, što bolšaść hledačoŭ nieznajomaja z asablivaściami dy akaličnaściami padrychtoŭki «Rok-karanacyi». U faje kancertnaj zali možna było pačuć słovy pra toje, što narešcie ŭ Miensku nadaryłasia mahčymaść patrapić na dobry kancert dy pabačyć razam na scenie ŭlubionych muzykaŭ. Maładyja ludzi z zachapleńniem abmiarkoŭvali afarmleńnie sceny, dobry huk i kameru, što lotała nad hałovami hledačoŭ. Tym časam, u arhanizataraŭ štohadovaj cyrymonii svaje pytańni da imprezy. Tak, muzyčny partał «Tuzin hitoŭ» zajaviŭ pra vychad ź liku arhanizataraŭ i abvieściŭ pra stvareńnie svajoj muzyčnaj premii.
Varta adznačyć tych, chto vyznačaŭ sioleta hałoŭnych biełaruskich rok-hierojaŭ 2007 hodu. Heta Siarhiej Aniščanka (dyrektar festyvalu «Rok-Koła»), Taciana Zamiroŭskaja (muzyčny ahladalnik «Biełorusskoj haziety»), Radek Dambroŭski (arhanizatar festyvalu «Basovišča»), Siarhiej Budkin (hałoŭny redaktar partału «Tuzin Hitoŭ»), David Bluŭštejn (pradziusar festyvalu «be2gether»), Viktar Siamaška, (muzyčny žurnalist, radyjo Junistar), Źmicier Padbiareski (muzyčny žurnalist), Jury Cybin (zasnavalnik cyrymonii «Rok-Karanacyja»), Vital Supranovič (kiraŭnik łejbłu BMA-hrup), Valik Hryško (redaktar MTV u Biełarusi), Maksim Žbankoŭ (žurnalist, kulturolah), Maša Jar (muzyčny redaktar «Aŭtaradyjo»), Pavał Kašyryn (arhanizatar rok-kancertaŭ), Viktar Paźniakoŭ (menedžer biełaruskaha katalohu kampanii West Records), Kaciaryna Pytleva (muzyčny žurnalist, Pieršy muzyčny kanał) i Viktar Holcaŭ (kiraŭnik łejbłu Go-records).
