Škada płanietu, pryhožaja była. A chutka nam i dźviuch takich budzie mała. Fota: TheLostCrusader via reddit
Ad siońniašniaha dnia čałaviectva spažyvaje resursy, što Ziamla nie zmoža adnavić za hety hod, śćviardžaje Global Footprint Network.
Isnuje peŭny limit resursaŭ, jaki Ziamla moža adnavić. Na hod hety limit taki, što siońniašniaje čałaviectva spažyła ŭsie «dapuščalnyja» resursy ŭžo 13 žniŭnia. Upieršyniu my «pierastupili rysu» ŭ 1970 hodzie.
Z taho času ludziej na Ziamli stała na 95% bolš, a pazvanočnych žyvioł — mienš na 52%, śćviardžajuć ekołahi.
Umoŭnaja rysa ŭličvaje tolki patreby čałavieka ŭ resursach — patreby inšych žyvych istot navat nie ŭličvajucca, a ŭ ich my taksama adbirajem resursy dy škodzim im svajoj dziejnaściu (chacia ŭva mnohim ad ich zaležym).
Jašče 15 hod tamu my dasiahali limitu 4 kastryčnika. Siońnia my vykarystoŭvajem stolki resursaŭ, kolki mahła b nam dać nie adna, a 1,6 Ziamli. Čas pierasialacca na bolšuju ŭ 1,6 raz za našuju płanietu «Ziamlu 2.0»? Nie.
Ekołahi śćviardžajuć, što kali raźvićcio ekanomiki budzie iści zvyčajnymi tempami, nam nie chopić i «Ziamli 2.0» — užo ŭ 2030-m nam spatrebicca dvajnaja kolkaść resursaŭ Ziamli. Praŭda, kali skaracić na tracinu vuhlarodnyja vykidy (heta pałova našaha «śleda» na Ziamli), da 2030 hoda my možam «ucichamirycca» da 1,5 Ziemlaŭ.
Ź siońniašnimi tempami rostu ekanomiki ŭ 2030-m my vyčarpajem «dapuščalnuju» normu 20 červienia, ale kali skarocim vuhlarodnyja vykidy na tracinu, — to tolki 16 vieraśnia.
Źmienu klimatu praź dziejnaść čałaviectvu nazvaŭ hałoŭnaj pahrozaj čałaviectvu prezident ZŠA Barak Abama. Niadaŭna jon prapanavaŭ płan, pavodle jakoha Štaty majuć na tracinu skaracić vykidy parnikovych hazaŭ da 2030 hoda. Ale ci vykanaje ZŠA płan pry nastupnych prezidentach i ci paśleduje za Amierykaj astatni śviet, nieviadoma.
