Biełaruś zacikaŭlenaja bolš aktyŭna vykarystoŭvać paŭdniovyja party Ukrainy, zajaviŭ ministr zamiežnych spraŭ Biełarusi Uładzimir Makiej u intervju telekanału ONT padčas vizitu va Ukrainu. Stenahrama intervju apublikavanaja na sajcie MZS Biełarusi.
«Naš vizit u Adesu tłumačycca ŭ pieršuju čarhu mienavita žadańniem vyvučyć mahčymaści pašyreńnia pastavak našych hruzaŭ cieraz paŭdniovyja party Ukrainy. — zajaviŭ Makiej. — Pavodle vynikaŭ 2014 hoda dola biełaruskich hruzaŭ u ahulnym abjomie hruzaŭ, pieravalenych cieraz paŭdniovyja party Ukrainy, składaje bolš za 12%. Ale my abmiarkoŭvali ŭčora (13 žniŭnia) sa spadarom Saakašvili, kiraŭnikom administracyi Adeskaj vobłaści, pierśpiektyvy pašyreńnia hetaha abjomu, i my damovilisia pra kankretnyja kroki ŭ hetym kirunku».
Pavodle słoŭ ministra, hetaje pytańnie abmiarkoŭvałasia i na jaho sustrečy z prezidentam Ukrainy Piatrom Parašenkam. «My damovilisia pahladzieć na pytańni našaha ŭzajemadziejańnia ŭ śfiery transpartna-łahistyčnaj infrastruktury kompleksna. Miarkujecca pahladzieć na čyhunačnyja taryfy, na partovyja zbory, tamu što ad hetaha taksama zaležyć abjom pieravalenych hruzaŭ. Naša supracoŭnictva pavinna być vyhadnym dla abodvuch bakoŭ», — skazaŭ Makiej.
Kiraŭnik MZS adznačyŭ, što razmova pra «kankretnuju budučyniu supracoŭnictva» ŭ transpartna-łahistyčnaj śfiery taksama išła na sustrečy z kiraŭnictvam Adeskaha porta.
Vizit Makieja va Ukrainu adbyŭsia 12—16 žniŭnia.
