Pretendent u kandydaty na pasadu prezidenta RB Taćciana Karatkievič 17 žniŭnia naviedała mahiloŭskuju turmu №4 i sustrełasia z načalnikam hetaj ustanovy. Mienavita ŭ turmie №4 zaraz adbyvaje pakarańnie palitviazień, kandydat na pasadu prezidenta na prezidenckich vybarach 2010 hoda Mikałaj Statkievič.
Pa słovach Taćciany Karatkievič, metaj jaje vizita ŭ turmu było pakazać, što biełaruskaje hramadstva pamiataje pra Mikałaja Statkieviča i inšych palitviaźniaŭ, što ŭsich nieabyjakavych ludziej chvaluje ich los, što palitviaźniaŭ čakajuć na svabodzie.
Načalnik turmy Alaksandr Dmitroŭ pahadziŭsia sustrecca z patencyjnaj kandydatkaj na pasadu prezidenta i adkazaŭ na šerah jaje pytańniaŭ. Taćciana Karatkievič adznačyła, što pavodziŭ jon siabie vielmi vietliva, adnak na šmat jakija pytańni adkazvaŭ tolki toje, što ŭ daručanaj jamu ŭstanovie ŭsio robicca ŭ adpaviednaści z zakonam.
Načalnik turmy №4 taksama papiaredziŭ, što nie moža raskazvać padrabiaznaści pra ŭmovy ŭtrymańnia ŭ turmie, ale skazaŭ pra toje, što Mikałaju Statkieviču była pradastaŭlena mahčymaść razmovy z žonkaj, što napiaredadni svajho Dnia naradžeńnia Mikałaj Statkievič atrymaŭ šmat listoŭ i paštovak z voli i ŭsie jany byli, zhodna z zakanadaŭstvam, dastaŭleny da adrasata.
Taćciana Karatkievič kaža, što jana nahadała načalniku turmy №4 pra toje, što los Mikałaja Statkieviča chvaluje mnohich ludziej, a taksama zapytałasia, ci zadavoleny jon efiektyŭnaściu svajoj pracy, adnak i na heta pytańnie prahučaŭ adkaz, što ŭ turmie №4 usio robicca ŭ adpaviednaści z zakanadaŭstvam.
Taćciana Karatkievič naviedała i Mahiloŭskuju vypraŭlenčuju kałoniju IK-15, dzie ŭ jaje taksama adbyłasia sustreča z načalnikam ustanovy Alaksiejem Łazarenka. Pretendent u kandydaty padkreśliła, što spadar Łazarenka byŭ nie vielmi razhavorlivy i adkazvaŭ na pytańni ŭ asnoŭnym tolki, što ŭ IK-15 usio robicca ŭ adpaviednaści z zakonam.
U abodvuch vypraŭlenčych ustanovach hutarki ich kiraŭnikoŭ z patencyjnym kandydatam zapisvalisia na dyktafon. Taćciana Karatkievič z humaram adznačyła, što zatoje zaraz dva načalniki turmaŭ u Mahilovie viedajuć pra toje, što jość taki pretendent u kandydaty, jak jana.
Predendent u kandydaty kaža, što padčas praviadzieńnia pikietavańnia pa zboru podpisaŭ i sustreč ź ludźmi joj davoli časta zadajuć pytańni pra los biełaruskich palitviaźniaŭ. Toje, što palitviaźni jość k našaj krainie, vielmi chvaluje i jaje asabista. Mienavita heta i s tała padstavaj dla naviedvańnia vypraŭlenčych ustanoŭ u Mahilovie.
