Były palitviazień Jury Rubcoŭ daviedaŭsia ab svaim vyzvaleńni, znachodziačysia ŭ štrafnym izalatary (ŠIZA) babrujskaj papraŭčaj kałonii. Pra heta jon raspavioŭ žurnalistam u noč z 22 na 23 žniŭnia, pa prybyćci dadomu ŭ Homiel.
Pa słovach Rubcova, z 14-ci dzion znachodžańnia ŭ babrujskaj kałonii 13 jon pravioŭ u ŠIZA. Jon pavinien byŭ vyjści adtul 23 žniŭnia ŭ 16.20, 22-ha paśla viačery jaho vyklikali da načalstva i zahadali sabrać rečy, ničoha nie patłumačyŭšy. Zatym Rubcova vyvieli za kantrolna-prapuskny punkt, vynieśli jaho čamadan i prapanavali pieraapranucca ŭ svaju vopratku. Tolki paśla hetaha aktyvistu paviedamili, što jon pamiłavany rašeńniem prezidenta.
Rubcoŭ vielmi ździŭleny i niezadavoleny tym, što jaho pamiłavali, bo, pa słovach aktyvista, jaho pavinny byli apraŭdać. «Łukašenka zrabiŭ čarhovy fint, vyzvaliŭ ludziej, jakich uziaŭ u zakładniki», — skazaŭ były palitviazień.
Pa słovach Rubcova, u papraŭčych ustanovach ź ludźmi abychodziacca hruba, jak z žyviołami, «razmaŭlajuć tolki krykam», prymać ježu ludzi vymušanyja tam ža, dzie chodziać u tualet. Aktyvist taksama zajaviŭ, što z boku administracyi kałonii da jaho ŭžyvalisia roznyja represii, ale heta jaho nie złamała.
Rubcoŭ raspavioŭ, što da pieravodu ŭ babrujskuju kałoniju, kali jon jašče znachodziŭsia ŭ śledčym izalatary ŭ Baranavičach, jon zrabiŭ sabie vyšyŭku na kašuli śpiecyjalna dla rabotnikaŭ SIZA. Na śpinie było vyšyta: «Asudziŭšy mianie, vas pazbavili prava aburacca žabrackaj zarpłataj», na hrudziach — «Nazyvajcie rečy svaimi imionami».
Rubcoŭ pierakanany, što nivodnaja palityčnaja siła nie pavinna ŭdzielničać u ciapierašnich prezidenckich vybarach, tamu što «heta fars». Havoračy ab svaich bližejšych płanach, homielski aktyvist zajaviŭ, što budzie «zmahacca dalej».
