Uviečary 25 žniŭnia na čyhunačnaj stancyi ŭ Maładečnie biełaruskija pamiežniki i mytniki z prymianieńniem siły źniali ź ciahnika Vilnia — Miensk homielskaha pravaabaroncu Leanida Sudalenku.
U Homiel jon zmoh dabracca tolki siońnia a šostaj ranicy.
«Ja viartaŭsia ź litoŭskaj stalicy ŭ Homiel. Na pamiežnym punkcie propusku Hudahaj mianie pravieryli mytniki — ničoha zabaronienaha ja nia vioz, i mytniki pajšli dalej. Prablemy pačalisia, kali moj pašpart praz skaner staŭ praviarać pamiežnik. Vyhladaje, što majo proźvišča ŭ niejkim «čornym śpisie». Pamiežnik adrazu vyklikaŭ staršaha źmieny. Viarnulisia j mytniki, praŭda, nia tyja, što mianie praviarali. Papiaredzili, što ŭ Maładečnie mnie treba syści ź ciahnika. U mianie byli kvitki ź Miensku na homielski ciahnik, ja paźniŭsia, tamu paprasiŭ patłumačyć pryčynu zatrymańnia. Adkazali, što buduć pravodzić pahłybleny mytny ahlad. Ja dastaŭ z zaplečnika razdrukavany artykuł 117 Mytnaha kodeksu i jašče raz zapytaŭsia, jakija dastatkovyja padstavy jość, kab heta rabić. Pakolki ničoha ŭciamnaha ni mytniki, ni pamiežniki mnie nie patłumačyli, to ja admoviŭsia pakidać vahon», — raspavioŭ Svabodzie Leanid Sudalenka.
U Maładečnie pravaabaroncu sustrakali bolš za dziasiatak pamiežnikaŭ i mytnikaŭ, jaho siłaj vynieśli z vahona za ruki j za nohi. «Vynas» pamiežniki zdymali na videa. U Sudalenki padniaŭsia kryviany cisk — słužboŭcy musili vyklikać jamu chutkuju dapamohu.
«Mnie ŭčynili asabisty ahlad z raździavańniem, ź pierapisvańniem rečaŭ. Šukali niejkija plastykavyja bankaŭskija kartki. A ŭ mianie ŭ hamancy — 144 eŭra i 243 tysiačy biełaruskich rubloŭ. Pravodziŭ ahlad inspektar Alaksandar Labiecki, a dazvoł, jak mnie paviedamili, daŭ načalnik Mienskaj rehijanalnaj mytni Alaksandar Bahdzievič», — raskazaŭ Leanid Sudalenka.
Praź dźvie hadziny pravaabaroncu adpuścili. U Miensk na homielski ciahnik jon spaźniŭsia. Musiŭ brać novyja kvitki i na ciahnik da Miensku, i ź Miensku da Homiela. Ni mytniki, ni pamiežniki anijak nie dapamahajuć źniatym ź ciahnikoŭ hramadzianam dabracca da miesca pryznačeńnia.
Heta nia pieršy asabisty ahlad na miažy pravaabaroncy Sudalenki. Jon ciapier sudzicca z Ašmianskaj mytniaj za kamputar. jaki zabrali ŭ jaho jašče ŭ traŭni i dahetul nie viarnuli.
«Sudovaja sprava z mytnikami za kamputar, mahčyma, taksama dadała ŭvahi da majoj ścipłaj persony. Učorašnija dziejańni mytnikaŭ na miažy ja taksama budu abskardžvać. Ale, jak mnie padajecca, najbolš kamuści nie daje spakoju maja pravaabarončaja dziejnaść, systemnaja praca z Kamitetam AAN pa pravach čałavieka. Adsiul i ahlady na miažy, i kryminalnaja sprava pra raspaŭsiud parnahrafii nibyta ad majho imia, i pahrozy praź internet na adras majoj siamji», — ličyć Leanid Sudalenka.
