U Minsku i Homieli źniali abmiežavańni na razdrobny prodaž ałkaholnych napojaŭ i piva. Ciapier śpirtnoje možna budzie kupić navat u načny čas, kali krama pracuje kruhłasutačna.
Jak rastłumačyli ŭ Minharvykankamie, rašeńnie ab źniaćci abmiežavańniaŭ było pryniata paśla narady pa pytańniach vytvorčaści i abarotu ałkaholnaj pradukcyi, jakuju 20 žniŭnia hetaha hoda pravioŭ kiraŭnik Biełarusi. Alaksandr Łukašienka zapatrabavaŭ ad urada navieści žorstki paradak u hetaj śfiery.
«Aktyŭnaja palityka, jakuju prapanoŭvaŭ urad i siońnia prapanuje, praktyčna ŭhrobiła, jak kažuć śpiecyjalisty, halinu. Akcyzy pryviali da pavieličeńnia koštu i razam z kantrafaktam — da źnižeńnia popytu na hetuju pradukcyju, a značyć — straty biudžetu. Pryvatnyja struktury za košt pavarotlivaści i za košt nie viedaju jakich faktaraŭ zaniali kala 35% rynka, pry hetym niadobrasumlenna paciaśniajučy dziaržaŭnyja struktury, u tym liku z dapamohaj sietkavych struktur», — zajaviŭ na naradzie biełaruski kiraŭnik.
U svaju čarhu staršynia Homielskaha abłvykankama Uładzimir Dvornik padčas niadaŭniaj aparatnaj narady na temu ekanamičnaj situacyi ŭ rehijonie adznačyŭ, što za hod realizacyja mocnych ałkaholnych napojaŭ skaraciłasia adrazu na 30%. Pry hetym, pavodle jaho słoŭ, pić mienš nie stali.
«U vobłaść vialikimi partyjami zavoziać levy tavar, u asnoŭnym, z Rasii. Takuju harełku biez dakumientaŭ zvyčajna realizujuć u sielskich kramach. Hałoŭnaja biada ŭ tym, što mnohija adkaznyja kiraŭniki na miescach navat nie zaŭvažajuć hetaj źjavy, pa sutnaści, źmirylisia sa stanoviščam spraŭ. Navučyciesia analizavać rynak — navučyciesia i handlavać. Śpirt — važnaja krynica dachodaŭ. Hetuju nišu nielha ŭpuskać», — skazaŭ kiraŭnik Homielskaj vobłaści.
Zabarona na prodaž ałkaholu ŭ Homieli dziejničała amal dva hady (z 31 kastryčnika 2013 h.), a ŭ Minsku — krychu bolš za dva miesiacy (z 15 červień 2015).
Uviadzieńnie abmiežavalnych mier HUUS Minharvykankama tłumačyła tym, što realizacyja ałkaholu ŭ handlovaj sietcy horada ŭ načny čas sutak akazvaje najbolš niehatyŭny ŭpłyŭ na kryminahiennuju situacyju ŭ Minsku.
U toj ža čas dadzienyja UUS Homielskaha abłvykankama dajuć supiarečlivuju karcinu na hety kont. Kali za minuły hod u Homielskaj vobłaści ŭ stanie ałkaholnaha apjanieńnia było ździejśniena 2227 złačynstvaŭ, što na 5,5% mienš, čym u 2013 hodzie, to za šeść miesiacaŭ hetaha hoda ŭ stanie ałkaholnaha apjanieńnia było ździejśniena 1128 złačynstvaŭ, što na 2,9% bolš, čym za anałahičny pieryjad minułaha hoda.
«Ja siońnia razmaŭlaŭ z rabotnikami śpiecpryjomnika. Hruba kažučy, byłoha vyćviareźnika. Dva dni jak admianili zabaronu, ale ŭ ich nie adbyłosia nijakaha značnaha napłyvu naviednikaŭ. Pjanych było i tak šmat. U ich u paraŭnańni ź minułym hodam napaŭnialnaść vyšejšaja. Moža być, heta źviazana sa śpiakotaj. Ludzi pierabirali i hublali aryjentacyju. Pryčyn moža być masa», — raspavioŭ supracoŭnik pres-słužby UUS Homielskaha abłvykankama.
Na pytańnie ab tym, nakolki efiektyŭnaj była zabarona, surazmoŭca adkazaŭ, što «ludzi pjuć usio roŭna».
Varta adznačyć, što ŭ Minsku padčas dziejańnia zabarony na prodaž ałkaholu paśla 22:00 piva i harełku možna było spakojna nabyć u tak zvanych «butlehieraŭ» i taksistaŭ. Praŭda, pa dvajnoj canie.
Doktar-psichaterapieŭt Dźmitryj Sajkoŭ, jaki ŭžo bolš za 30 hadoŭ zajmajecca lačeńniem ałkaholnaj zaležnaści, ličyć źniaćcie zabarony na prodaž ałkaholu ŭ viačerni i načny čas časovaj mieraj i źviazvaje rašeńnie uładaŭ «z surjoznaj ekanamičnaj situacyjaj».
«Usie źviony ekanamičnaha łancužka ciapier pavinny napružycca, kab niejak razrulvać situacyju. Jak hramadzianin ja heta razumieju, ale jak śpiecyjalist nie mahu radavacca tamu, što my vymušanyja iści na hety krok. U cełym takija časovyja abmiežavańni ŭ płanie baraćby z ałkahalizmam asablivaj roli nie hrajuć, ale ŭ kompleksie ź inšymi mierapryjemstvami heta ŭnosiła svaju leptu», — kaža doktar Sajkoŭ.
