Sojm Partyi BNF 29 žniŭnia prahałasavaŭ za vychad z vybarčaj kampanii Taciany Karatkievič. Mahčymaja kandydatka na prezydenta Taciana Karatkievič hetak prakamentavała pretenzii lidera partyi BNF Alaksieja Janukieviča adnosna jaje pazycyi što da biełaruskaj movy, nacyjanalnaj symboliki i mižnarodnaha stanovišča Biełarusi:
«Chaču na heta zaŭvažyć, što my ŭ kaalicyi «Narodny referendum» užo vyznačylisia z hetymi pazycyjami. Što tyčycca mižnarodnych adnosinaŭ, u nas dva asnoŭnyja pryncypy: heta adkaznaje susiedztva i raźvićcio ekanamičnych, kulturnickich, adukacyjnych stasunkaŭ z krainami Eŭraźviazu, i z Ukrainaj taksama. My za zbalansavanuju palityku, jakaja padtrymaje niezaležnaść Biełarusi — i z hetym zaŭsiody była zhodnaja partyja BNF. Što tyčycca movy, dyk ja i ŭsia kaalicyja zaŭsiody vystupali za raźvićcio biełaruskaj movy. Adnosna symboliki — ja sama vystupaju za bieł-čyrvona-bieły ściah. Voś učora my byli ŭ muzei dziaržaŭnaści i zaŭvažyli dy ŭnieśli prapanovu, što hetaja symbolika i tam pavinna być. Liču sumnieŭnymi vyniki referendumu 1995 hodu, na jakim symbolika była źmienienaja, i miarkuju, što kali pryjdziem da ŭłady, ich treba pierahladzieć i pryniać adpaviednaje rašeńnie. A zaraz vielmi važna zrabić hetak, kab bieł-čyrvona-bieły ściah byŭ pryznany historyka-kulturnaj kaštoŭnaściu, jak i Pahonia. Voś kali my źbirali podpisy, łunaŭ bieł-čyrvona-bieły ściah, i ja vielmi spadziajusia, što hetaja tendencyja svabody zachavajecca, što my zmožam stajać z symbolikaj, jakaja adpaviadaje našym kaštoŭnaściam, i paśla vybaraŭ. Vielmi važna zachavać hetuju tendencyju, a heta treba rabić razam.
Uvohule, što da pretenzij da mianie, jany mianie troški ździŭlajuć, bo my tolki ŭ aŭtorak sustrakalisia z Alaksiejem Janukievičam i nijakich vostrych pytańniaŭ pierada mnoj nie paŭstała ź jahonaha boku. My vielmi dobra parazmaŭlali, i jon ničoha nie kazaŭ, što jość takaja prapanova ź jahonaha boku vychodzić z prezydenckaj kampanii Taciany Karatkievič. Troški dziŭna. Padajecca, što heta niepaśladoŭnaja palityka.
Zatoje chaču skazać, što ŭ nas vielmi dobra atrymałasia źbirać podpisy razam, i ja vielmi ŭdziačnaja ŭsim tym siabram, aktyvu partyi BNF za toje, što mianie padtrymlivali. Jašče na tym pikiecie, dzie ja kazała, što my ŭžo sabrali 100 tysiač podpisaŭ, ja zrabiła akcent na tym, što kali my zaniatyja pracaj z hramadztvam i idziem da svaich metaŭ, my bolš abjadnanyja. I bolš zrazumiełyja dla hramadzianaŭ. Voś heta samaje hałoŭnaje, što treba zachavać. Ciapier nia čas unutranych razborak».
