Mienš za ŭsich pašancavała Taćcianie Karatkievič — ad jaje staranna padrychtavanaj pramovy zastalisia tolki słovy padziaki svajoj inicyjatyŭnaj hrupie.
Pramovu ž pradstaŭnika Łukašenki Michaiła Ordy u efir puścili amal całkam, prybrali tolki padziaki inicyjatyŭnaj hrupie i CVK.
Aleś Pilecki na Jeŭraradyjo rasšyfravaŭ poŭnyja viersii pramovaŭ, čornym vydzielenyja tyja słovy, jakija pačuła kraina.
Karatkievič
Siońnia ja atrymlivaju rehistracyju ŭ jakaści kandydata ŭ prezidenty Respubliki Biełaruś. Heta stała mahčymym dziakujučy tamu, jak spracavała maja kamanda. Dziakujučy tym ludziam, jakija padpisalisia ŭ maju padtrymku. Ščyra, ad usiaho serca ja im siońnia dziakuju.
Ja hanarusia tym, što siońnia źjaŭlajusia adzinaj demakratyčnaj alternatyvaj i pradstaŭlaju tych ludziej, jakija chočuć mirnych pieramienaŭ. Jakija padpisalisia za majo vyłučeńnie. I taja bolšaść ludziej, jakija 11 kastryčnika addaduć svoj hołas za mianie — jany ŭsie vydatna viedajuć i razumiejuć, što ŭłada pavinna mianiacca. Mianiacca mirna.
Samyja raźvityja, bahatyja krainy, heta tyja, dzie ludzi nie zajmajuć post prezidenta bolš čym dva terminy.
Biełarusi siońnia patrebny novy kiraŭnik dziaržavy. Novaja kamanda.
Apošnija piać hadoŭ z hetaj staroj kamandaj pakazali, što jany byli lišnimi. Za hety čas jakaść žyćcia našych hramadzian stała značna horšaj. A kali ŭzhadać abiacańni Łukašenki pra tysiačny zarobak, to dzie jon? Davajcie ŭzhadajem i zazirniem u našy kašalki. Tam značna mienš hrošaj, čym było piać hadoŭ tamu. Pryčyna hetaha ŭ zastoi, jaki pryvioŭ da hłybokaha ekanamičnaha kryzisu. Pryčyna hetaha ŭ biaździejańni ŭładaŭ.
Dać hetaj uładzie jašče piać hadoŭ, heta značyć jašče bolš pahoršyć naša stanovišča. Nam patrebnyja novyja lidary. Nam patrebnyja novyja idei. Nam patrebnyja novyja mietady. Mienavita heta patrebna, kab Biełaruś zrabiła krok napierad. Vyjšła z kryzisu. Zabiaśpiečyła ekanamičnaje raźvićcio i dabrabyt u biełaruskich siemjaŭ.
Łukašenka siońnia stamiŭsia. Jamu treba adpačyć. Tak budzie lepš dla ŭsich.
Mirnyja pieramieny, tolki tak. Dziakuj za ŭvahu.
Hajdukievič
Vy viedajecie, ja hanarusia, što źjaŭlajusia lidaram najbujniejšaj Libieralna-demakratyčnaj partyi ŭ našaj krainie. Dla mianie heta vialiki honar. Kali ja źbiraju podpisy, ja viedaju, što mianie padtrymlivaje ŭ Respublicy Biełaruś vielizarnaja kolkaść ludziej. Heta dobra. Bo ja za mocnuju Biełaruś. Demakratyčnuju, suvierennuju, kab nad našaj krainaj było mirnaje nieba. Kab my žyli ŭ spakoi, miry i zhodzie, darahija hramadzianie. Kab vy zaŭsiody pamiatali jak ja havaryŭ: paradak u krainie — heta zamožnaść u domie. Ja za hodnuju piensiju. Za hodny zarobak. Ja za mocnuju Biełaruś. Kvitniejučuju i mirnuju. I ja zrablu ŭsio, što ad mianie zaležyć u hetaj prezidenckaj kampanii, kab ludzi pačuli mianie ad vioski da horada Minska. Ja spadziajusia, što hetaja prezidenckaja kampanija projdzie ŭ takim duchu i takim razumieńni. I chaj ludzi vyrašajuć, što jany chočuć, i što jany chočuć čuć. Heta my vyznačym paśla prezidenckaj kampanii. Za Biełaruś!
Ułachovič
Ja ŭpieršyniu ŭdzielničaju ŭ hetaj kampanii. Darosłym čałaviekam, z darosłymi ambicyjami, viedajučym ekanomiku. Ja čałaviek daśviedčany. Maju na ŭvazie, u vytvorčaści. Pracavaŭ i kiravaŭ. Tamu ja idu ŭ prezidenty Respubliki Biełaruś, spadziajusia prynieści karyść Radzimie, na siońniašni dzień nie takaja ŭžo i prostaja abstanoŭka. Tak, nasamreč, kryzis zakranuŭ usich. Šmat chto sprabuje patłumačyć, vyrašyć nievyrašalnaje. Budziem pracavać razam, budziem jaho pieraadolvać. Ja rad, što siońnia staju pierad vami ŭ jakaści kandydata ŭ prezidenty Respubliki Biełaruś. Usio.
Orda
Naša inicyjatyŭnaja hrupa pracavała ŭ haradach, rajonnych centrach, pasieliščach, vioskach i ŭsio, što my ŭbačyli, varta adznačyć — ludzi staviacca da hetych vybaraŭ nieabyjakava. Ludzi razumiejuć, što vyrašajecca los krainy. Kandydatury Alaksandra Ryhoraviča akazanaja, šlacham zboru podpisaŭ, biesprecedentnaja padtrymka. I ludzi padtrymali kandydaturu Alaksandra Ryhoraviča Łukašenki, pastavili svoj podpis za jaho, jak za mudraha i mocnaha palityka. Jany padtrymali Alaksandra Ryhoraviča Łukašenku, jak nacyjanalnaha lidara, jaki nikoli nie sychodziŭ ad prablem i zaŭsiody byŭ adkaznym za svaju krainu i svoj narod. Ja dziakuju za jakasnuju pracu ŭsim členam inicyjatyŭnaj hrupy, dziakuju členam Centralnaj vybarčaj kamisii za pracu. Dziakuj.
