Kandydat u prezidenty Taćciana Karatkievič abiacaje zrabić usio, kab «viarnuć prestyž prafiesii nastaŭnika i zrabić našu adukacyju sučasnaj». Ab hetym jana zajaviła padčas svajho druhoha pieradvybarnaha vystupleńnia pa kanale «Biełaruś-1» 24 vieraśnia.
Pavodle jaje słoŭ, sučasnaj Biełarusi patrebnyja kadry z sučasnymi viedami. «Dastupnaja i jakasnaja adukacyja — asnova našaha dabrabytu i stabilnaha raźvićcia», — padkreśliła kandydat u prezidenty.
Karatkievič adznačyła, što ŭ suśvietnym rejtynhu paśpiachovaści VNU Biełaruś pradstaŭlena tolki dvuma ŭniviersitetami, u toj čas jak maleńkaja Litva — čatyrma, a Polšča — šaściu, što moładź atrymlivaje adukacyju dziela korački, pry hetym amal 70% vyšejšaj adukacyi płatnaja. «Dla bolšaści studentaŭ i ich baćkoŭ košt navučańnia zahraničny. A što my atrymlivajem uzamien? Studenty śmiajucca z padručnikaŭ ź minułaha stahodździa, sastarełym abstalavańniem. Vychodziać sa svaimi dypłomami, a rynku jany nie patrebnyja», — skazała jana.
Recept vychadu z takoj situacyi viadomy, ličyć Karatkievič. «Treba pierastać izalavać našu adukacyju ad sučasnaha śvietu. Novy vopyt i novyja viedy niemahčymyja biez svabodnaha vałodańnia zamiežnymi movami. Raźmierkavańnie — heta hodnaja dziaržaŭnaja harantyja pieršaha pracoŭnaha miesca dla maładoha śpiecyjalista, a zusim nie panščyna, jak siońnia», — adznačyła jana.
Karatkievič pierakananaja, u što dziaržaŭnych VNU ŭsie biełaruskija studenty pavinny vučycca biaspłatna, jak heta zroblena ŭ Francyi ci Hiermanii. «Jakasnaja i dastupnaja adukacyja — zusim nie padačka hramadzianam ad dziaržavy, a adna z samych vyhadnych inviestycyj, jakija tolki mohuć być. Ludzi, jakija atrymajuć zapatrabavanuju prafiesiju, buduć zarablać bolš, a značyć budzie bolš padatkaŭ i mahčymaściaŭ zabiaśpiečyć sacyjalnuju abaronu i raźvićcio krainy», — padkreśliła jana.
Jašče adnoj vidavočnaj sacyjalnaj prablemaj Karatkievič nazvała stanovišča nastaŭnikaŭ i vykładčykaŭ, ich «nizki sacyjalny status, mizernyja zarpłaty, vielizarnyja nahruzki». «Kab nastaŭnik zajmaŭsia vučniami, jaho treba vyzvalić ad masy administracyjnych i ideałahičnych zadač. Niadziŭna, što maładyja ludzi nie žadajuć iści ŭ hetu prafiesiju i nabor na piedahahičnyja śpiecyjalnaści prachodzić biez konkursu. Nastaŭnik pavinien vučyć i atrymlivać za heta hodnuju zarpłatu», — zajaviła kandydat u prezidenty.
