Zdareńnie adbyłosia ŭ babrujskaj kaviarni «Dolče Vita» jašče 12 vieraśnia.
Kampanija z šaści čałaviek — pieravažna svajaki — adznačali dzień narodzinaŭ. U adzin z momantaŭ mama i ciotka imianińnicy niečakana zaharelisia prosta pierad abjektyvam videakamiery.
Jeŭraradyjo ŭdałosia rasšukać 54-hadovuju Halinu Hołub — tuju samuju žančynu, jakaja ŭspychnuła na videa. Jaje ŭžo vypisali z balnicy. Na ščaście, paciarpiełaja atrymała apioki 8% cieła i paźbiehła surjoznych kalectvaŭ.
«Tak, na videa ja. Siadzieła śpinaj da barnaj stoki i nie bačyła, jak usio zdaryłasia. Uspychnuła raptoŭna. Potym daviedałasia ad blizkich, što pierad hetym za susiedni stolik ludzi zamovili šašłyki.
Vyjšaŭ čałaviek z talerkaj, tancavaŭ. A na barnaj stojcy niešta padpalili. Napeŭna, chacieli, kab było pryhoža. Ale atrymałasia, što my zaharelisia. Śledčy ŭ balnicy kazaŭ, što nibyta ŭ zali adkryli dźviery, i ad pavietra atrymaŭsia taki efiekt», — zhadvaje toj trahičny viečar Halina Ivanaŭna.
Paśla zaharańnia žančyna vyskačyła ŭ kalidor i sarvała ź siabie sukienku, kab patušyć hałavu. U vyniku abpaliła patylicu, šyju i ruki.
«Muž kaža, kali ja vyskokvała, na śpinie było dźvie pałasy. Moža być, jany padpalvali barnuju stojku pry dapamozie niejkaj vadkaści i vypadkova linuli hetaj vadkaści na nas», — razvažaje Halina Hołub.
Paciarpiełaj padałosia padazronym, što jaje abharełaja sukienka ŭ vyniku z kaviarni źnikła.
44-hadovaja Ludmiła Łacuk, rodnaja siastra haliny Hołub, paciarpieła troški mienš: atrymała apioki 5% cieła. Adnak abpaliła tvar. Svaju abharełuju koftu žančyna pieradała dziažurnamu śledčamu.
Pavodle infarmacyi ad paciarpiełych, pravierku daručyli pravodzić milicyi. Žančyny niepakojacca, što abjektyŭnaha pakarańnia vinavatyja nie paniasuć.
Halina Hołub apaviadaje, što supracoŭniki kaviarni prychodzili da ich u balnicu i sprabavali damaŭlacca.
«My ludzi niekanfliktnyja, byli nie suprać. Ale što na heta skazać i jak škodu acanić, my nie viedali. Mianie ž nie abpalvajuć kožny dzień. Jany taksama maŭčali i pierahladalisia miž saboj. Ja i skazała pra 100 miljonaŭ, kab pahladzieć na ich reakcyju. Paśla hetaha jany pačali pahražać, što ŭ ich u pravaachoŭnych orhanach svaje ludzi i my ničoha nie dabjemsia. Tady my vyrašyli, što hrošaj ad ich nam nie treba, i niachaj z usim raźbirajecca sud».
Darečy, jak vyśvietliła Jeŭraradyjo, infarmacyja pra ŭzharańnie ŭ «Dolče Vita» ŭ zvodkach MNS nie prachodziła.
Viersija dyrektara kaviarni: «Na žančynach zahareŭsia łak paśla taho, jak raźliŭsia kaktejl».
«Heta byŭ niaščasny vypadak. Bačyć Boh, nichto takoha nie chacieŭ. Adnak paciarpiełyja razdźmuli ŭ sacsietkach vielmi vialikuju šumichu, źjaviłasia vielmi šmat paklopaŭ», — baronić reputacyju «Dolče Vita» jaje dyrektar Mikałaj Makovič.
Kiraŭnik kaviarni paviedamlaje, što ŭžo naniatyja advakaty, kab źviarnucca ŭ sud z sustrečnaj pozvaj.
Jon ličyć, što paciarpiełyja skarystalisia situacyjaj, kab spahnać z kaviarni 100 miljonaŭ rubloŭ. Taksama dyrektar niezadavoleny infarmacyjaj, jakuju pabačyŭ u sacsietkach.
«Pišuć, što pravodziłasia fajer-šoŭ, što ludzi mocna abhareli. Jość aficyjnaje zaklučeńnie daktaroŭ, što stupień paražeńnia skury — 4—8%. Heta ni ab čym. A stupień ciažkaści — 1 i 2-ja. Pieršaja stupień — heta kali vy ŭzialisia za patelniu rukoj. Druhaja — troški bolš surjoznaja. Šnary, rubcy i inšyja ślady pry takich stupieniach nie zastajucca. A pišuć, što 3-4 stupień ciažkaści i mocna abhareli. Vielmi šmat paklopaŭ», — aburajecca Mikałaj Makovič.
Pry hetym dyrektar «Dolče Vita» padkreślivaje, što jaho ŭstanova nie admaŭlaje svajoj viny i akazała paciarpiełym usialakuju padtrymku. U pryvatnaści, žančynam u balnicu pryvozili mazi, binty i sadavinu.
Viersiju pra fajer-šoŭ Mikałaj Makovič kateharyčna admaŭlaje:
«My nie pravodzim fajer-šoŭ! Jak patłumačyli milicyjaniery, na žančynie było vielmi šmat łaku. Rabilisia kaktejli, jakija padajucca padpalenymi. I atrymałasia što kaktejl hety pieraviarnuŭsia. Vypadkova kropielka trapiła na vałasy. Praz toje, što na ich było šmat łaku, zdaryłasia ŭzharańnie».
Siostry Halina Hołub i Ludmiła Łacuk čakajuć vynikaŭ pravierki i źbirajucca źviartacca ŭ sud.
