Nobieleŭskuju premiju pa litaratury atrymała biełaruska Śviatłana Aleksijevič. Abjaŭlajučy łaŭreata, pradstaŭnica nobieleŭskaha kamiteta adznačyła, što premija prysudžanaja «za jaje polifaničnuju prozu, jakaja źjaŭlajecca pomnikam pakutam i mužnaści ŭ naš čas».
U Zachodnich vydańniach navina vyklikała vialiki rezanans.
Brytanskaja hazieta The Guardian źviartaje ŭvahu, što Aleksijevič źjaŭlajecca 14-j žančynaj, jakaja atrymała nobieleŭskuju premiju ŭ halinie litaratury.
Vydańnie ŭziała intervju ŭ biełaruskaha palityka Andreja Sańnikava. Jon zajaviŭ, što byŭ u zachapleńni ad źviestki ab atrymańni premii suajčyńnicaj:
«Ja niervavaŭsia z učorašniaha viečara. Choć bukmiekiery i pradkazvali joj pieramohu, ale, viadoma, dakładna nichto viedać nie moža. Ja taki ščaślivy. Jana sapraŭdy zasłuhoŭvaje hetaj uznaharody. Jana vialiki čałaviek, hłyboki, ŭdumlivy, cikavaja surazmoŭca, vielmi ščyraja».
Rasijskaja słužba VVS adznačaje, što hetaja pieršaja Nobieleŭskaja premija dla Biełarusi.
Hazieta Independent taksama napisała pra biełaruskuju piśmieńnicu. Tam adznačajecca, što «jana stała vynachodnicaj novaha litaraturnaha žanru, zasnavanaha na realnych intervju, a taksama patrapiła pad mocny ŭpłyŭ svajho kalehi, biełaruskaha piśmieńnika Alesia Adamoviča»
Ispanskaja hazieta El Pais apisvaje žyćcio piśmieńnicy i adznačaje, što jak krytyk ciapierašniaha biełaruskaha palityčnaha režymu, jana najčaściej žyvie za miažoj, u Hiermanii, dzie jaje apošniaja kniha mieła vialiki pośpiech.
Francuzskaje vydańnie Le Figaro apublikavała vytrymki z raniejšaha intervju piśmieńnicy. Tam Aleksijevič kaža, što znachodzicca ŭ pałonie žurnalistyki, ale žurnalistykaj nazyvać svaje tvory nie choča. I nazyvaje ich «ramanam hałasoŭ».
Amierykanski kanał CNN na svaim sajcie źmiaściŭ vialiki materyjał pra Śviatłanu Aleksijevič i pryvodzić źviestki ź jaje bijahrafii. Tvorčaść piśmieńnicy vydańnie apisvaje jaje ž słovami:
«Ja pišu historyju čałaviečych pačućciaŭ. Toje, što ludzi dumali, razumieli i pamiatali padčas padziei. Toje, u što jany vieryli ci nie vieryli, ich iluzii, nadziei i strachi, ich dośvied. Takoje niemahčyma ŭjavić ci prydumać, va ŭsialakim vypadku, u takim mnostvie realnych detalaŭ».
Amierykanskaje ŚMI New York Times piša, što ŭ ZŠA Aleksijevič viedajuć pa knizie «Čarnobylskaja malitva», jakaja była pierakładzienaja piśmieńnicaj Kiejt Hiesen. Hetaja kniha atrymała Nacyjanalnuju knižnuju premiju Critics Circle.
Tehi «Alexievich» u Tvitary znachodziacca ŭ topach. Intensiŭnaść abnaŭleńniaŭ, pa stanie na 18 hadzin, składaje 100 tvitaŭ za 30 siekund.
