Padčas akcyi pratestu ŭviečary 11 kastryčnika na Kastryčnickaj płoščy supracoŭniki DAI zatrymali adnaho z kiroŭcaŭ.
Pra heta paviedamlaje pravaabarončy centar «Viasna».
Kiroŭca, jakoha kličuć Ihar Małachaŭ, zapisaŭ svaju razmovu z daišnikami na videa. Siońnia rolik źjaviŭsia ŭ internecie.
Pryčynaj spynieńnia aŭtamabila, vidavočna, pasłužyła toje, što, prajaždžajučy nasuprać miesca praviadzieńnia akcyi, Ihar Małachaŭ prasyhnaliŭ u znak padtrymki, u hety ž čas z akna jahonaj mašyny byŭ vyviešany bieł-čyrvona-bieły ściah.
Jak paviedamlaje partał tut.by sa spasyłkaj na znajomaha Ihara Małachava, «z akna ŭ jaho łunaŭ bieł-čyrvona-bieły ściah. Kala cyrku mašynu spynili supracoŭniki DAI i, nie tłumačačy ničoha, prymušali jechać u RAUS dla razboru. Ale, pakolki kiroŭca ničoha nie parušyŭ, jechać u milicyju jon admoviŭsia. Aŭtamabil abšukali i znajšli ŭ bahažniku 5 pačak soku. Inspektary paprasili dać ček na tavar, ale jaho ŭ kiroŭcy nie akazałasia. Supracoŭniki DAI zajavili, što sok moža być kradzieny, i skazali čakać ekspertnuju hrupu».
Ihar Małachaŭ čakaŭ paŭtary hadziny, ale nichto da jaho nie pryjechaŭ. Paśla 22:00 supracoŭniki DAI adpuścili kiroŭcu.
