Siońniašniaje rašeńnie Rady EZ ab prypynieńni na 4 miesiacy sankcyjaŭ adnosna Biełarusi «Svaboda» paprasiła prakamentavać eks-kandydata ŭ prezydenty Tacianu Karatkievič. Ź joj hutaryŭ Jury Drakachrust.
Karatkievič: Heta krok nasustrač Biełarusi. U majoj prahramie było zapisana, što my vystupajem za raźvićcio stasunkaŭ z Eŭraźviazam. Ułada siońnia pakazała, što jana hatovaja da kamunikacyi z Eŭraźviazam, kab hetyja stasunki pryviali da mirnych pieramienaŭ.
A z boku Eŭropy chaciełasia b, kab zachavałasia palityka «dvuch trekaŭ» — stasunki z uładaj i stasunki z hramadzianskaj supolnaściu i palityčnymi demakratyčnymi arhanizacyjami.
Prypynieńnie sankcyjaŭ na 4 miesiacy — heta šaniec, i ja liču, što jaho treba vykarystać.
RS: Vy skazali pra kamunikacyju. Ale voś z vami, tak zdajecca, kamunikacyja va ŭłady nie naładziłasia — vy asprečvajecie vyniki vybaraŭ, jakija ŭłada abviaściła.
Karatkievič: Ja mieła na ŭvazie kamunikacyju ŭłady z Eŭraźviazam, intensiŭny dyplamatyčny dyjaloh apošnich miesiacaŭ. A maje kamunikacyi z uładaj jakija byli, takija i zastalisia — paralelnyja.
RS: Častka apazycyi ličyć, što EZ pryniaŭ kiepskaje rašeńnie, što EZ hetym rašeńniem uskładniaje baraćbu za demakratyju ŭ Biełarusi, maŭlaŭ, demakratyja — heta dla nas, a dla vas, biełarusaŭ — Łukašenka. Vy niazhodnaja z takim pohladam?
Karatkievič: Ja jakraz toj čałaviek, jaki demakratyčna zmahaŭsia za ŭładu, za pieramohu. Umovy byli niaroŭnyja, ale ja sa svajho boku zrabiła ŭsio, što mahčyma. I ja siońnia baču, jak patrebnyja Biełarusi mirnyja pieramieny. Dla ich nam niepatrebnyja sankcyi.
Adnak vielmi nie chaciełasia b, kab Eŭropa skarystała hetyja adčynienyja dźviery dla taho, kab supracoŭničać tolki z uładaj. Tolki raźvitaja hramadzianskaja supolnaść moža harantavać demakratyčnuju budučyniu Biełarusi.
RS: Nu voś vam jak palityku hetaje rašeńnie paškodzić ci paspryjaje?
Karatkievič: Dla mianie budzie dobra ŭsio, što budzie dobra dla Biełarusi, dla biełarusaŭ. A kali hetaja miera budzie pravilna vykarystanaja, to jana budzie dobraj dla Biełarusi i biełarusaŭ.
