U Biełarusi ŭžo šmat hadoŭ isnuje prablema z zapisam dla padačy dakumientaŭ na vizu ŭ pasolstva najbližejšych zachodnich susiedziaŭ — Polščy i Litvy. Naviny.by vyśvietlili, ci źmianiłasia situacyja z adkryćciom vizavaha centra Litvy, i skłali svajho rodu instrukcyju dla naviedvalnikaŭ.
Vizavy centr Litvy: usio dla zručnaści naviedvalnikaŭ
Zapisacca ŭ vizavy centr Litvy akazałasia prostaj spravaj: u pačatku vieraśnia miescy prapanoŭvali litaralna praz 2—3 dni z momantu zvarotu. Mianie ž zadavalniała bolš poźniaja data vizitu, i ja jaje atrymała. Na elektronnuju poštu mnie pryjšoŭ list ab zapisie na pryjom, jaki nieabchodna razdrukavać i pradjavić pry naviedvańni vizavaha centra.
Zapoŭnić ankietu samastojna nieskładana, tym bolš što sistema nie zachoŭvaje ankietu, kali ŭ joj utrymlivajucca pamyłki, a aŭtamatyčna prapanuje vypravić niapravilnyja abo zapoŭnić prapuščanyja pali.
Śpiecyjalist vizavaha centra ŭručaje naviedvalnikam błank zhody na apracoŭku piersanalnych dadzienych, jaki možna zapoŭnić i zahadzia, a taksama pamiatku, u jakim paradku nieabchodna skłaści dakumienty. U pieraliku dakumientaŭ, apublikavanym na sajcie vizavaha centra, nie pakazanaja «kopija pašparta» — jaje možna zrabić samastojna i biaspłatna ŭ vizavym centry, tut ŭstanoŭleny try ksieraksy.
Pry nieabchodnaści ŭ vizavym centry možna atrymać šerah dadatkovych pasłuh, što na samaj spravie vielmi zručna. Prosta na miescy možna zrabić fatahrafii abo aformić strachoŭku.
Zapoŭniŭšy zhodu na apracoŭku piersanalnych dadzienych i skłaŭšy ŭ patrebnym paradku dakumienty, znoŭ padychodžu da śpiecyjalista, jaki ŭžo vydaje tałon elektronnaj čarhi. Choć miescaŭ dla čakańnia ŭ vizavym centry šmat, prysieści nie ŭdałosia — adrazu zahareŭsia moj numar.
Śpiecyjalist prymaje dakumienty, vizicior zapaŭniaje ahienckuju damovu. Usie dakumienty na vizu pakujucca ŭ płastykavuju tečku. Zatym treba apłacić konsulski zbor i pasłuhi servisnaha centra, na kožnuju sumu vydajuć asobny ček. Čerhaŭ niama i ŭ kasu — bolš za dvuch čałaviek pierad akiencami nie zaŭvažyła.
Dla zdaču bijamietryčnych dadzienych treba znoŭ atrymać tałon na elektronnuju čarhu.
Na ruki naviedvalniki vizavaha centra atrymlivajuć pakiet dakumientaŭ: ahienckuju damovu, čeki, kopiju pašparta sa štampam i infarmacyjny list ź instrukcyjaj ab pracedury viartańnia pašparta.
Uražańni ad naviedvańnia vizavaha centra samyja pazityŭnyja: piersanał vietlivy, usio vydatna arhanizavana.
Ambasady zvyčajna vydajuć pašpart ź vizaj praz tydzień. Zvarot praź vizavy centr, jak akazałasia, nie viadzie da pavieličeńnia terminu razhladu chadajnictva. Roŭna praź siem rabočych dzion ja zabrała pašpart ź vizavaha centra, papiarednie pahladzieŭšy na sajcie status zajavy. U kanviercie akramia pašparta lažała kvitancyja ab atrymańni pasolstvam 60 jeŭra, na samim kanviercie — napamin, što važna pravieryć na vizie: termin dziejańnia, kolkaść vyjezdaŭ, kolkaść dzion znachodžańnia, napisańnie imia i proźvišča, sieryju i numar pašparta, najaŭnaść piačatki konsulstva.
Jeŭra-rubli-jeŭra
Za dzień da naviedvańnia vizavaha centra Litvy mieła kłopat abmianiać 60 jeŭra na biełaruskija rubli. Viadoma, jość ludzi, jakija z adnoj zarpłaty mohuć zrabić usio: apłacić vizu, darohu, žyllo i jašče zastaniecca na šopinh ci zabavy. Ale bolšaść z nas da pajezdak rychtujecca za 2—3 miesiacy, adkładajučy častku zarobku. Naturalna, u toj valucie, u jakoj majuć namier vydatkoŭvać. I navat ciapier, viedajučy ab apłacie konsulskaha zboru ŭ rublach, ludzi ŭsio roŭna buduć kuplać valutu, bo jana bolš nadziejnaja čym «zajčyki».
Vizavy centr Litvy prymaje płatu za konsulski zbor u biełaruskich rublach pa biahučym kursie, vyznačanym «BiełŚvisBankam». Ja svaje 60 jeŭra abmianiała ŭ «MTBanku», atrymaŭšy 1.188.000 rubloŭ (kali b mianiała ŭ toj ža dzień u «BiełŚvisBanku», to atrymała b 1.185.600 rubloŭ). Adnak u kasu vizavaha centra za konsulski zbor daviałosia ŭnieści 1.209.000 rubloŭ — vizavy centr pieraličvaje pa kursie prodažu. Takim čynam, na ŭsich hetych apieracyjach straty dla mianie asabista skłali 21 000 rubloŭ.
Zrazumieć łohiku Nacbanka, pa jakoj hrošy za konsulski zbor u vizavych centrach treba ŭnosić u biełaruskich rublach, nijak nie mahu. Ale, mabyć, niešta zastajecca ŭ našaj kaźnie, kali vizavyja centry za našy rubli znoŭ kuplajuć valutu.
Servisny zbor vizavaha centra Litvy składaje 18 jeŭra pa kursie Nacbanka Biełarusi, a kali nieabchodna aformić bijamietryčnyja dadzienyja, to suma pavialičvajecca da 20 jeŭra.
Centry vizavaj padtrymki: možna za valutu
Varta było tolki ŭ pošukaviku paznačyć svaju cikavaść da vizaŭ, jak kampjutar nastojliva pačaŭ prapanoŭvać rekłamu tak zvanych centraŭ vizavaj padtrymki. Vyrašyła daviedacca: a što ŭ ich novieńkaha. Napeŭna, zaraz taksama ŭsie zbory ŭ biełaruskich rublach. Akazvajecca, nie. Chtości i na sajtach nie saromiejecca vystaŭlać canu ŭ jeŭra, inšyja padčas telefonnaj razmovy ŭdakładniajuć: «Tak-tak, u jeŭra, vy ž razumiejecie …»
U adnoj takoj kampanii mianie zapeŭnivali, što «litoŭcy turystyčnuju multyvizu zaraz nie adkryvajuć» i prapanoŭvali za 80 jeŭra zrabić «dziełavuju» vizu na paŭhoda, padaŭšy nieabchodny pakiet dakumientaŭ. «Heta sa źnižkaj, raniej u nas było daražej, ciapier turystaŭ stała mienš», — pryciahvaŭ mianie supracoŭnik kampanii. Da hetaj sumy treba dadać jašče 80 jeŭra — za konsulski zbor i servisny zbor vizavaha centra.
U inšaj firmie mianie nahruzili ličbami, sutnaść jakich zvodziłasia da taho, što kali mnie adkryjuć razavuju vizu na try dni, to heta adna suma, a voś kali na 10 dzion, to ŭžo inšaja. «Słuchajcie, a voś jak vy upłyvajecie na kolkaść dzion? Bo jak konsuł vyrašyć, stolki dzion i budzie. Vam za što ja pavinna płacić u zaležnaści ad kolkaści dzion?» — pytajusia. U adkaz niavietliva pakłali trubku. Praŭda, ceny nazyvali vyklučna ŭ biełaruskich rublach. Zatoje sumy vialikija.
U nastupnaj firmie mianie zapeŭnivali, što bieź ich dapamohi ja nie zmahu zapoŭnić ankietu. Darečy, firma za hetuju pasłuhu biare 120 tysiač suprać 60 tysiač u vizavym centry Litvy. Taksama mianie pierakonvali, što biez paćvierdžańnia broni transpartu pasolstva kateharyčna nie prymie da razhladu dakumienty. Nu i, naturalna, prapanoŭvali zabraniravać avijabilety ŭ Vilniu.
Na samaj spravie, akramia pieraliku nieabchodnych dakumientaŭ pasolstva pakidaje za saboj prava zapatrabavać dadatkovyja dakumienty, naprykład, paćviardžeńnie miesca pražyvańnia, dakumienty na transpart. Heta značyć, treba być hatovym da taho, što ich mohuć zapatrabavać, ale zusim nie značyć, što biez takich dakumientaŭ vašu zajaŭku nie prymuć da razhladu.
Darečy, pry afarmleńni turystyčnaj vizy ŭ ankiecie usio roŭna nieabchodna ŭkazvać hatel, u jakim vy zabraniravali miesca. Hetuju infarmacyju konsulskaj słužbie pravieryć praściej prostaha.
Paraŭnalnaja tablica koštu pasłuh, nieabchodnych dla padrychtoŭki niekatorych dakumientaŭ na zapyt vizy
Taksama ŭ ankiecie jość punkt «pieradapłočany transpart», i kab sa spakojnaj dušoj pastavić u im hałačku, treba mieć na rukach kvitki. Nabyć kvitki zahadzia pry pajezdcy za miažu — pravilnaje rašeńnie z usich bakoŭ.
Adnak vypadak z žyćcia — u mižnarodnych kasach Centralnaha aŭtavakzała admovilisia pradać kvitok za 25 dzion da vyjezdu, i za 20 dzion taksama. Maŭlaŭ, kvitki ŭ prodaž nie pastupili. «Heta ž za miažu pajezdka, treba dahavor zaklučyć, kab aŭtobus prapuścili praź miažu», — nastaŭlała mianie kasir.
Dziŭnaja sprava: jość rehularny raskład, ale niama damovy. Vyrašyła abmierkavać situacyju z byłym biletnym kasiram — zaraz žančyna na piensii. Jana patłumačyła, što na takich jaje byłych kaleh mahična dziejničaje fraza «dajcie knihu skarhaŭ». Jašče adna maja znajomaja savieckaj zahartoŭki skazała, što «dla ciabie niama kvitkoŭ, tamu što ty nie zdahadałasia prynieści dziaŭčynkam šakaładku». Nie, «dziaŭčynki» nie dačakajucca: ja suprać karupcyi, a ŭžo suprać bytavoj asabliva.
Mienš, čym košt šakaładki, akazaŭsia zbor za kuplu kvitka praź internet — tam jany čamuści jość. Ale paśla vakzalnych kasiraŭ dla mianie było pryncypova važnym vybrać litoŭskaha pieravozčyka, što ja i zrabiła. Darečy, i zvarotny kvitok nabyła na litoŭskuju elektryčku: jana tańniejšaja za našu. Ale heta liryčnaje adstupleńnie.
Akramia braniravańnia avijabiletaŭ zhadanaja firma prapanavała mnie daviedku ab kanviertacyi valuty jak finansavuju harantyju dla ambasady. Što heta za daviedka takaja, sprabavała ja daviedacca ŭ kansultantaŭ niekalkich bankaŭ, čym, zdajecca, mocna ich źbiantežyła. Usie adkazy zvodzilisia da taho, što bank pa patrabavańni klijenta vydaje dla ambasady daviedku ab ruchu hrošaj pa rachunku albo rešty na rachunku. Kali havorka idzie pra zarpłatny rachunak, to pakažuć valutny ekvivalent najaŭnaj sumy. Heta značyć, pasiaredniku tut niama miesca.
A voś daviedki bankaŭ ab ruchu hrašovych srodkaŭ kaštujuć pa-roznamu: 50 tysiač rubloŭ u «BPS-banku», 75 tysiač — u «MTBanku», 10 dalaraŭ — u «Biełaruskim narodnym banku».
Paśla vizitu ŭ vizavy centr Litvy i abtelefanoŭki/pierapiski z tak zvanymi centrami vizavaj padtrymki nie daje spakoju tolki adno pytańnie: čamu arhanizacyi, jakija pracujuć u pravavym poli, i ich klijenty majuć niejkija lišnija kłopaty z kruhavarotam valuty i biełaruskich rubloŭ i čamu niama nijakich prablem u tych, chto pracuje pa vielmi sumniŭnych schiemach i prymaje ŭ jakaści apłaty valutu?
Viadoma, kožny čałaviek volny sam vybirać — iści lehalnym šlacham abo pasprabavać padmanuć sistemu. Ale druhi varyjant nie vyklučaje, što možna akazacca padmanutym samomu. I za prykładam daloka chadzić nie pryjšłosia.
Niejkaja žančyna, jakaja vyjšła ŭśled za mnoj ź vizavaha centra, viała z kimści niepryjemnuju razmovu pa mabilnym telefonie: «Vy mnie abiacali vizu minimum na try miesiacy, a mnie dali razavuju. Vy skazali, kali ja pakładu na rachunak 1000 jeŭra, to mnie daduć vialikuju vizu. Ja zaniała hrošy, pakłała, i što ja atrymała? Viarnicie, što ja vam zapłaciła, vy — ašukancy».
Miarkujučy pa ahulnym tonie razmovy, nichto ničoha joj nie źbirajecca viartać.
