Siońnia ŭviečary, 18 kastryčnika, u Łondanie adbudziecca arhanizavany Biełaruskim svabodnym teatram kancert salidarnaści z zabaronienymi artystami z usiaho śvietu i z narodam Biełarusi «I'm with the Banned» (Ja — z zabaronienymi). U im voźmuć udzieł suśvietna viadomyja muzykanty i akciory.
Na scenu kancertnaj zały Koko ŭ Łondanie vyjduć Devid Hiłmar (Vialikabrytanija), Brutto (Biełaruś), Pussy Riot (Rasija), Bumboks (Ukraina), a taksama śpiecyjalna zaprošanyja hości — Kim Ketrał, Nił Tenant, Džuljet Styviensan, Viktoryja Madesta, Džeremi Ajrans.
Łoha kancerta raspracavaŭ viadomy kitajski mastak Aj Vejvej.
Na sajcie nn.by budzie vieścisia žyvaja tranślacyja. Pačatak a 21-j pa minskim časie.
***
Napiaredadni kancertu «Svaboda» pahutaryła z suzasnavalnikam i mastackim kiraŭnikom Biełaruskaha svabodnaha teatru Mikałajem Chalezinym.
Radyjo Svaboda: Kali i jak uźnikła ideja takim čynam adznačyć dziesiacihodzd́zie Svabodnaha teatru?
Mikałaj Chalezin: Ideja ŭźnikła hod tamu. My daŭno chacieli niejak pradstavić tut u Londanie našych biełaruskich muzykantaŭ, ale niejkaj jaskravaj nahody nie było. A paśla, kali my zadumalisia pra vybary i pra toje, što dla biełarusaŭ heta dastatkova składany čas, my prydumali taki kancert. A tut jašče nakłałasia vajna na ŭschodzie Ŭkrainy, zabarona roznych hurtoŭ — i heta ŭžo stała nia tolki biełaruskaj temaj, a temaj rehijonu. «Pussy Riot» pad zabaronaj u Rasiei, «Bumboks» taksama zabaronieny ŭ Rasiei. «Brutto» stali detanataram, kali zrabiłasia jasna, što jany ŭžo nia mohuć vystupać ni ŭ Biełarusi, ni ŭ Rasiei… Tady my pačali havaryć z mnohimi ludźmi, kab jany prajavili salidarnaść z našymi muzykantami.
RS: Kaho my pabačym na kancercie?
MCH: Pieršym adhuknuŭsia Dejvid Hiłmar. Paśla pastupova pačali adhukacca inšyja ludzi — šmat našych siabroŭ, aktoraŭ, muzykantaŭ, i ŭ vyniku ŭ pracy nad hetym kancertam sabrałasia vialikaja hrupa.
Tranślavać kancert zhadziłasia Bi-Bi-Si, paśla padklučylisia sajty, telekanały «Biełsat», rasiejski «Dožd́» i ŭkrainski «Espresa TV» — my sabrali ŭsich, kaho mahli sabrać.
Dejvid Hiłmar zachacieŭ zajhrać razam z muzykami z «Bumboksu» i vykanać ź imi pieśniu, pryśviečanuju «Niabiesnaj sotni», a «Bumboks» zajhraje ź im jahonyja pieśni. Z «Brutto» zajhraje jašče adzin viadomy hitaryst. Kim Katreł («Seks i horad») zajhraje z aktorami «Svabodnaha teatru» ŭryvak z spektaklu «Miensk 2011». Ja zajhraju ź Niłam Tenantam (Pet Shop Boys) uryvak z «Pakaleńnia Jeans». Budzie j jašče ceły šerah siurpryzaŭ — Džeremi Ajranz, Džulijet Styvensan, Viktoryja Madesta — samyja roznyja ludzi, jakija vyrašyli, što im treba vykazacca na znak salidarnaści z tymi, chto ciapier u biadzie.
RS: Niadzielny kancert adkryvaje seryju imprezaŭ, pryśviečanych 10-hadovamu jubileju teatru. A što jašče čakajecca ŭ ramkach śviatkavańnia?
MCH: Ad 2 da 14 listapada projdzie teatralny festyval — «Svabodny teatar» zajhraje svaje dziesiać spektaklaŭ, pradstaŭlajučy dziesiać hadoŭ svajoj pracy. Ź ich siem spektaklaŭ projduć na kanśpiratyŭnych placoŭkach, pra jakija jašče j ciapier hledačy, raskupiŭšy ŭsie bilety, nia viedajuć, dzie jany buduć prachodzić — im budzie paviedamlena praz SMSki, kudy im treba pryjści. heta samyja niečakanyja miescy — ad zakrytych turmaŭ da budynku parlamentu.
Apošnija try spektakli projduć na scenie teatru Young Vic, rezydentami jakoha my źjaŭlajemsia. Kožny spektakl budzie supravadžacca hramadzkimi dyskusijami, dehustacyjaj stravaŭ biełaruskaj kuchni i biełaruskaha samahonu.
U ramkach adznačeńnia jubileju my vypuścili knihu On Freedom, u jakoj sabranyja 34 karotkija manalohi pra svabodu vielmi viadomych ludziej — tam i Majkł Atenbora, i Dejvid Łem, i viadomy amerykanski mastak Eryk Fišł, a taksama ludzi z našaha teatru. Kniha budzie prezentavanaja na festyvali, my jaje ŭžo atrymali z drukarni, jana ŭžo pastupiła i ŭ kniharni.
Lahatyp hetaha ŭsiaho prajektu raspracavaŭ kitajski mastak-dysydent Aj Vejvej u toj momant, kali jon jašče zastavaŭsia pad chatnim aryštam. Jon taksama prajaviŭ svaju salidarnaść i byŭ vielmi aktyŭny ŭ kampanii «I'm with the Banned».
