Pieraviešvańnie ručnikoŭ u łaziency i pierastanoŭka vazonaŭ na padvakońni moža davieści da samahubstva — dakazana Štazi. Pra metady psychalahičnaha źniščeńnia apanentaŭ kamunistyčnaha režymu raskazvaje Ivan Sijak na sajcie Bird in Flight.
Paśla padzieńnia Berlinskaha muru dla vyvučeńnia adkrylisia 111 kilametraŭ stelažoŭ z papiarovymi dakumentami, 47 — ź mikrafilmami, bolš za 1 400 000 fatazdymkaŭ, aŭdyjozapisaŭ i kinastužak. Jany śviedčać ab tym, jak u HDR budavałasia orvełaŭskaja systema ŭsieahulnaha sačeńnia i pakarańnia inšadumcaŭ.
U 1970-ch hadach pačałasia narmalizacyja adnosin pamiž dźviuma častkami padzielenaj Niamieččyny. Pryznaŭšy paślavajennyja miežy, krainy ŭstalavali dyplamatyčnyja adnosiny, a nieŭzabavie HDR pryniali ŭ AAN. Nie źjaŭlajučysia bolš izhojem u źniešniaj palitycy, HDR aściarožniej, z ahladkaj na mižnarodnyja normy, ciapier pravodziła ŭnutranuju. Ministerstva dziaržaŭnaj biaśpieki (Ministerium für Staatssicherheit / Stasi / Štazi) vymušana było prycišyć ahresiŭnaść, ź jakoj pieraśledavała i sadžała ŭ turmy dysydentaŭ.
Cprabujučy źnizić kolkaść palityčnych źniavolenych, ale nia dać dysydentam padniać hałavu, u 1976 hodzie Štazi zapuskaje zusim sakretnuju prahramu Zersetzung, čyju nazvu pierakładajuć jak «razłažeńnie» abo «bijadehradacyja».
Jana praduhledžvała razbureńnie sakretnymi metadami karjery, pryvatnaha žyćcia, samoj asoby palityčnych aktyvistaŭ u sprobie nia dać im mahčymaści, sił i času procistajać režymu. U hetym uładam dapamahała armija tajemnych ahientaŭ i infarmataraŭ, kolkaść jakich da 1975 hodu dasiahnuła 200 000, heta značyć 1% ad nasielnictva krainy.
Cytata ź instrukcyi Ministerstva dziaržbiaśpieki HDR № 1 / 76:
«Zaćvierdžanymi metadami «Bijadehradacyi» jość:
• Systematyčnaja dyskredytacyja šlacham raspaŭsiudžvańnia praŭdzivych, praviarajemych i falšyvych, ale praŭdapadobnych hańbavalnych zajaŭ.
• Systematyčnaja arhanizacyja pravałaŭ u pracy i sacyjalnym žyćci dla źniščeńnia ŭpeŭnienaści subjektaŭ u sabie.
• Sfakusavanaje źniščeńnie pierakanańniaŭ, źviazanych z peŭnymi ideałami i prykładami dla pierajmańnia, stvareńnie sumnievaŭ u słušnaści svajoj pazycyi.
• Stvareńnie ŭ hrupach i arhanizacyjach atmasfery niedavieru, uzajemnaj padazronaści i supiernictva z dapamohaj vykarystańnia słabaściaŭ niekatorych ź ich členaŭ… »
Pavodle dadzienych nazirańniaŭ, paviedamleńniaŭ stukačoŭ i apytańniaŭ najbližejšaha atačeńnia składaŭsia psychalahičny profil subjekta «Bijadehradacyi» z akcentam na jaho słabaści, pa jakich nanosiŭsia navukova abhruntavany i vyrazna praličany ŭdar. Niadziŭna, što niemcy časta ciarpieli ad svajoj akuratnaści i pedantyčnaści. Naprykład, u mnohich dakazanych vypadkach ahienty Štazi pranikali ŭ kvatery, kab pieraviesić karciny, pasunuć meblu, zamianić hatunki harbaty i specyi ŭ bankach.
U spravie lekara R. z horadu Šveryn pieraviešvańnie ručnikoŭ u łaziency i pierastanoŭka vazonaŭ na padvakońni spałučalisia z razbureńniem karjery. Hałoŭny lekar, sakretny supracoŭnik Štazi, pastajanna i ŭ prysutnaści kaleh abviarhaŭ pastaŭlenyja joju dyjahnazy, a nastrojenyja adpaviednym čynam chvoryja admaŭlalisia ad jaje lačeńnia. Praź niekalki miesiacaŭ achviara pieraśledu zvolniłasia z pracy, pierajechała ŭ inšy horad i pierastała vychodzić z kvatery. Da vykryćcia systemy «Bijadehradacyja» jana nie dažyła niekalki miesiacaŭ, pakončyŭšy z saboj nieŭzabavie paśla padzieńnia Berlinskaha muru.
Manipulacyi z pradmietami ŭ kvatery, biaskoncyja telefonnyja zvanki, niezamoŭlenyja dastaŭki (u dakumentach zhadvajucca vibratary) razburali psychiku. Atručvańnie ježy i naŭmysna niapravilnaje lačeńnie — zdaroŭje. Ananimki, čutki i fotamantažy — reputacyju.
Pavodle sučasnych acenak, achviarami «Bijadehradacyi» stali da 10 000 čałaviek, psychicy nia mienš za pałovu ź ich była naniesienaja niezvarotnaja škoda.
