«Tym časam vynik majoj 15-hadovaj pracy ź viciebskaj temaj adpraŭlajecca ŭ druk u Vilni, — piša Viktar Marcinovič u svaim fejsbuku. — Hety tekst staŭ toj vośsiu, vakoł jakoj kruciłasia majo žyćcio paŭtara dziesiacihodździa. Z-za jaho ja syšoŭ z BDU, tak i nie dačakaŭšysia kandydackaj abarony (čakaju da hetaha času), pieramiaściŭsia ŭ Litvu, atrymaŭ PhD Akademii mastactvaŭ, staŭ dacentam EHU; z-za jaho ja načavaŭ i načuju ŭ hatelach z kamadoraŭskimi stolami, z-za jaho vykładaju na anhlijskaj ŭ čužych univiersitetach (i na ruskaj i biełaruskaj — va ŭniviersitecie rodnym); z-za jaho ja žyŭ u Vienie ŭsiu minułuju vosień, prapracoŭvajučy vysnovy i vybudoŭvajučy strukturu raździełaŭ.
Ja doŭha dumaŭ nad adnym vyčarpalnym słovam, jakoje b pieradało ŭsiu paŭnatu taho, što zdaryłasia z Šahałam u 1918-1920-m hadach u horadzie, što tak zmučyŭ jaho. Słovam-prefiksam, što aznačyła b voś heta «Mark Šahał u Viciebsku» kanatacyjami, jakija nie patrabujuć dadatkovych tłumačeńniaŭ.
Słova, jak heta zaŭsiody byvaje, pryjšło samo saboj, kali ja ŭbačyŭ milicejskija furažki na toj samaj prezientacyi «Movy» ŭ Hrodnie. Radzima. Heta ŭsio nazyvajecca: Radzima. Radzima bje ciabie, ale robić ciabie taboj. Radzima nie zaŭvažaje ciabie tady, kali ty ŭžo źbiraješ natoŭpy na viernisažach ŭ Paryžy. Radzima śmiajecca ŭ śpinu. Radzima prymušaje ciabie ściskać kułaki, nazirajučy za paraksizmami nieprabiŭnoha hłupstva. Heta ŭsio — Radzima. Adzin siabar, jaki pračytaŭ hetuju knihu, skazaŭ, što jana — nie tolki pra Šahała. Ale — pra Michałka, pra Aleksijevič, pra Adamoviča, pra Drazdoviča — pra ŭsich, chto sprabavaŭ i sprabuje napoŭnić sensam našy biaskoncyja vierasovyja pustki…
Vokładka — Anatol Łazar, AdLiga. Fatahrafija — Piotr Šumaŭ, uradženiec Hrodna, jaki fatahrafavaŭ Radena, Chadasieviča i Ćviatajevu.
Dziakuj EHU, dziakuj «Budźmie», dziakuj litoŭskim siabram, starym i novym, jakija dapamahali mnie na maim šlachu.
31-ha kastryčnika niekatoryja vysnovy z hetaj knihi (ale — nie sama kniha) buduć pradstaŭlenyja na kruhłym stale ŭ Breście. Radzima, Mark».
