Uviečary 21 kastryčnika ŭ vioscy Stradzieč Bresckaha rajona vybuchnuŭ kanflikt pamiž miascovymi žycharami i supracoŭnikami DAI. Nahodaj stała sproba milicyjantaŭ kanfiskavać aŭto adnaho ź viaskoŭcaŭ. Pa słovach inśpiektaraŭ, da pryvatnaha padvorka jany nibyta pieraśledavali aŭtamabil, za rulom jakoha znachodziŭsia miascovy žychar, časova pazbaŭleny prava kiravańnia.
Jak raźvivalisia padziei, Jeŭraradyjo raspaviadaje Alaksandr Bialčuk, haspadar mašyny i baćka Rusłana, jakoha supracoŭniki DAI padazrajuć u kiravańni mašyny.
«Niedzie ŭ 19.20 patelefanavaŭ mnie syn. Kaža, što tak i tak: pryjechała na padvorak mašyna DAI i choča zabrać našu mašynu. Pryjechaŭ i baču: staić na padvorku «daišnik» i čaplaje syna, čaplaje niaviestku. Kažuć, što chočuć zabrać i mašynu, i syna, kab skłaści pratakoł. Ja i kažu, čaho parušajecie zakon?! Administracyjny pratakoł składajecca na miescy pravaparušeńnia, navat kali jon parušyŭ, to składajcie pratakoł tut i ŭsio».
Dziejańni pravaachoŭnikaŭ miascovyja žychary paličyli niezakonnymi. Pa ich słovach, dokazy viny Rusłana Bielčuka daišniki admovilisia pradjavić. Abaraniać majomaść adnasialčanina vyjšli susiedzi — svaimi aŭtamabilami jany zabłakavali vyjezd słužbovaj mašyny DAI. Na miesca zdareńnia viaskoŭcy vyklikali Śledčy kamitet i prakuraturu, kab tyja dali pravavuju acenku dziejańniam milicyjantaŭ.
Čakać pradstaŭnikoŭ hetych orhanaŭ daviałosia da ranicy 22 kastryčnika. Usiu noč ludzi trymali vartu i nie davali mahčymaść mašynie DAI vyjechać z padvorka.
U vyniku ad idei kanfiskavać aŭtamabil Bielčuka supracoŭniki DAI admovilisia. Prykładna ab 11-j ranicy viaskoŭcy ŭsio ž taki vyzvalili słužbovy aŭtamabil.
Na Rusłana Bielčuka skłali 2 pratakoły za niepadparadkavańnie milicyi i kiravańnie transpartnym srodkam pazbaŭlenym hetaha prava. Małady čałaviek ad tłumačeńniaŭ admoviŭsia i pratakołaŭ nie padpisaŭ. Svajoj viny jon nie pryznaje.
Kamientavać kanfliktnuju situacyju pradstaŭniki Śledčaha kamiteta, rajonnaj prakuratury i DAI na miescy admovilisia. Śviedka padziejaŭ Viktar kaža, što ludzi stali na abaronu susieda, bo nie zhodnyja z praduziatym staŭleńniem DAI da miascovych žycharoŭ.
«Noč ci dzień — usio roŭna, ź mihałkami spyniajuć kožny aŭtamabil, nibyta tam paŭsiul złačyncy siadziać. Heta niapravilna! U nas jość praca — my nie złačyncy, my pracujem u vioscy i ŭsio! Adnak nam pomściać usim… My ličym, što ŭsio za toje, što ŭ Stradziečy traktar chacieli zabrać… Za heta nas i pryciaśniajuć», — raspaviadaje mužčyna.
Jeŭraradyjo zhadvała pra tak zvany «traktarny kanflikt», jaki adbyŭsia 9 traŭnia 2014 hoda ŭ hetaj ža vioscy. Darečy, jaje hałoŭny fihurant — usio toj ža Alaksandr Bialčuk. U minułym hodzie DAI chacieła kanfiskavać u jaho samarobny traktar. Pavodle viersii inśpiektaraŭ, mužčyna jeździŭ na im biez rehistracyjnych numaroŭ pa darozie. Sam uładalnik, Alaksandr Bialčuk, kaža, što traktar vykarystoŭvaŭ tolki na pryvatnym padvorku.
Tady na abaronu viaskoŭca taksama źjavilisia svajaki i znajomyja. Padčas sproby kanfiskavać traktar pamiž viaskoŭcami i pravaachoŭnikami adbyłasia sutyčka. Milicyjanty źjechali biez traktara, a na Bielčuka zaviali kryminalnuju spravu za źbićcio supracoŭnika DAI. Sud pryznaŭ Alaksandra vinavatym i asudziŭ na try miesiacy aryštu. Viaskoviec užo adsiadzieŭ hety termin i da siońniašniaha dnia abskardžvaje rašeńnie suda, ź jakim nie zhodny.
Kamientavać kanfliktnuju situacyju pradstaŭniki Śledčaha kamiteta, rajonnaj prakuratury i DAI na miescy admovilisia. Adnak na sajcie Bresckaj abłasnoj milicyi źjaviŭsia aficyjny pres-reliz z nahody hetaha kanfliktu.
«21 kastryčnika kala 19.00 narad DPS DAI UUS Bresckaha abłvykankama, ruchajučysia pa vulicy Alaksandrava ŭ vioscy Stradzieč Bresckaha rajona, z dapamohaj hukavoj pryłady i ŭklučeńniem majačkoŭ čyrvonaha koleru pasprabavaŭ spynić aŭtamabil Volvo. Kiroŭca nie vykanaŭ patrabavańnie ab spynieńni i pačaŭ uciakać ad supracoŭnikaŭ DAI. Dalej lehkavik zajechaŭ ŭ dvor pryvatnaha doma pa vulicy Maładziožnaj, a kiroŭca admoviŭsia pakazać dakumienty», — paviedamlajecca ŭ aficyjnym pres-relizie milicyi.
Pa viersii pravaachoŭnikaŭ, za rulom Volvo znachodziŭsia 24-hadovy syn uładalnika aŭtamabila, jaki ŭ 2014 hodzie byŭ na dva hady pazbaŭleny pravoŭ. Taksama ŭ aŭtamabili byli žonka i hrudnoje dzicia, žyćciu jakich padčas pahoni kiroŭca pahražaŭ, hruba parušajučy praviły darožnaha ruchu.
«Dadzieny hramadzianin 22 razy parušaŭ PDR, ź jakich piać razoŭ — za kiravańnie transpartnym srodkam, nie majučy takoha prava. Parušalnik, viedajučy, što jon budzie pryciahnuty da adkaznaści, pa telefonie źviazaŭsia sa svajakami i paprasiŭ ich pryjechać da jaho. Svajaki, jakija pryjechali na aŭtamabilach, zabłakavali słužbovy aŭtamabil supracoŭnikaŭ milicyi i pasadzili ŭ Volvo svaich małaletnich dziaciej, čym pieraškodzili evakuacyi aŭtamabila na achoŭnuju stajanku. Kab paźbiehnuć abvastreńnia kanfliktnaj situacyi, supracoŭniki milicyi pryniali rašeńnie nie ŭžyvać fizičnuju siłu i śpiecsrodki ŭ dačynieńni da parušalnikaŭ», — adznačajecca ŭ pres-relizie.
