U Miadzielskuju rajonnuju balnicu 28 kastryčnika sa svajoj kvatery była dastaŭlena 29-hadovaja žančyna sa šmatlikimi traŭmami hałavy i rebraŭ. Pa padazreńni va ŭčynieńni złačynstva zatrymany jaje 29-hadovy muž.
Jak paviedamlajecca na sajcie UUS Minskaha abłvykankama, ustanoŭlena, što paciarpiełaja była źbitaja 23 kastryčnika.
Pavodle infarmacyi staršaha inśpiektara prafiłaktyki adździaleńnia achovy pravaparadku i prafiłaktyki Miadzielskaha RAUS Ramana Ivanca, muž žančyny staić na ŭliku ŭ kryminalna-vykanaŭčaj inśpiekcyi. Jon asudžany za kradziež i adbyvaje pakarańnie pa abmiežavańni voli. Mužčyna pracuje ślesaram na pradpryjemstvie «Miadzielahraservis».
«Dźviery nam doŭha nie adčyniali, choć my čuli, što ŭ kvatery chtości jość. Narešcie žančyna adčyniła dźviery. My ŭbačyli, u jakim jana stanie, vyklikali chutkuju dapamohu i śledča-apieratyŭnuju hrupu», — raskazaŭ Ivaniec.
Pavodle jaho słoŭ, papiarednie ŭstanoŭlena, što 23 kastryčnika prykładna ŭ 23.00 padazravany, znachodziačysia ŭ stanie ałkaholnaha apjanieńnia, u svarcy źbiŭ žonku. Dyjahnaz paciarpiełaj — zakrytaja čerapna-mazhavaja traŭma, zakryty pierałom dvuch rebraŭ źleva, pnieŭmatoraks, strasieńnie hałaŭnoha mozhu, spałučanaja traŭma siaredniaj ciažkaści. Žančyna špitalavana. Jaje muž źmieščany ŭ kamieru izalatara časovaha ŭtrymańnia.
Miadzielski rajonny adździeł Śledčaha kamiteta raspačaŭ spravu na padstavie č. 1 art. 147 KK (naŭmysnaje pryčynieńnie ciažkaha cialesnaha paškodžańnia).