Supracoŭnikami adździeła kryminalnaha vyšuku Savieckaha RUUS stalicy za ŭčynieńnie kradziažu hrašovych srodkaŭ zatrymanyja dźvie minčanki.
Jak paviedamlaje HUUS Minharvykankama, u Savieckaje RUUS ad pažyłoj siamiejnaj pary pastupiła zajava ab źniknieńni bujnoj sumy hrašovych srodkaŭ i załatych upryhažeńniaŭ. Pavodle słoŭ paciarpiełych, jany štomiesiac adkładvali hrošy ź piensijnych naličeńniaŭ, nakapiŭšy da vieraśnia hetaha hoda kala 300 młn rubloŭ.
Vyśvietliłasia, što z pačatku vosieni hetymi hrašami svabodna rasparadžałasia 18-hadovaja ŭnučka pažyłych ludziej, jakaja žyła sumiesna ź imi, a taksama jaje siabroŭka, jakaja była častaj hościaj u kvatery. Dziaŭčaty tracili hrošy na ŭłasnyja patreby: kuplali darahoje adzieńnie, chadzili ŭ restarany, nabyvali padarunki siabram i znajomym. Kali ž nakapleńni zakončylisia, zdali ŭ skupku niekalki załatych upryhažeńniaŭ (zavušnicy, łancužok, kułon), jakija znachodzilisia ŭ tajniku.
«Padčas apieratyŭna-vyšukovych mierapryjemstvaŭ taksama było ŭstanoŭlena, što adna z zatrymanych, siabroŭka ŭnučki paciarpiełych, raniej užo pryciahvałasia da kryminalnaj adkaznaści za ŭčynieńnie kradziažu», — skazaŭ namieśnik načalnika kryminalnaha vyšuku Savieckaha RUUS Minska Pavieł Kołas.
Zaraz u dačynieńni da dziaŭčat raspačataja sprava na padstavie č. 4 art. 205 KK (kradziež).