U Minsku 10 listapada aficyjna adkryŭsia univiersalny vizavy centr kampanii Pony Express. Centr akazvaje pasłuhi pa afarmleńni viz u Łatviju i Ispaniju, a ŭ chutkim časie płanuje pačać akazańnie pasłuh pa afarmleńni viz u Čechiju.
Jak adznačyŭ pasoł Łatvii ŭ Biełarusi Macińš Virsis, Łatvija supracoŭničaje z Pony Express z 2009 hoda. Pavodle słoŭ dypłamata, adkryćcio vizavaha centra ŭ Minsku źjaŭlajecca jašče adnym dokazam taho, što adnosiny pamiž Łatvijaj i Biełaruśsiu «aktyŭna raźvivajucca, u ludziej budzie dadatkovaja mahčymaść naviedvać Łatviju».
Virsis adznačyŭ, što ŭ hramadzian Biełarusi jość vybar, kudy padavać dakumienty na vizu — niepasredna ŭ konsulski adździeł Łatvii ci praź vizavy centr.
Pasłuhi vizavaha centra kaštujuć 387.200 rubloŭ za adzin pašpart z rehistracyjaj bijamietryčnych dadzienych, i 348.500 rubloŭ — biez rehistracyi. Košt vizy składaje 60 jeŭra.
Pavodle dadzienych pasolstva, za dziesiać miesiacaŭ biahučaha hoda łatvijskaje konsulstva ŭ Minsku vydała 28.832 vizy, konsulstva ŭ Viciebsku — 19.560 viz.
Dyrektar departamienta vizavych pasłuh Pony Express Natalla Jaŭsiejenka adznačyła, što kampanija źjaŭlajecca hałoŭnym łahistyčnym apierataram na terytoryi SND i praź jaje štohod padajecca bolš za 500 tysiač zvarotaŭ pa vizy. Kampanija vałodaje 152 vizavymi centrami ŭ Rasii, Biełarusi, Kazachstanie i Ukrainie.
Dyrektar Pony Express ŭ Biełarusi Mikałaj Hierasimaŭ adznačyŭ, što kampanija atrymała atestat adpaviednaści patrabavańniam pa abaronie infarmacyi ad Apieratyŭna-analityčnaha centra pry prezidencie Biełarusi, tamu klijenty vizavaha centra mohuć być upeŭnienyja ŭ biaśpiecy svajoj asabistaj infarmacyi.
