Alaksandr Łukašenka 12 listapada vydaŭ dekret № 8, jaki vykładaje ŭ novaj redakcyi dekret ad 6 žniŭnia 2009 hoda № 10 «Ab stvareńni dadatkovych umoŭ dla inviestycyjnaj dziejnaści ŭ Respublicy Biełaruś».
Dekret praduhledžvaje novaŭviadzieńni, jakija raniej nie byli vyznačanyja inviestycyjnym zakanadaŭstvam, paviedamlaje pres-słužba prezidenta.
Inviestycyjnyja dahavory buduć zaklučacca «tolki ŭ dačynieńni da pryjarytetnych siektaraŭ ekanomiki, vyznačanych uradam».
Źmienieny paradak vydzialeńnia ziamielnych učastkaŭ dla realizacyi inviestycyjnych prajektaŭ. U pryvatnaści, biez aŭkcyjona jany buduć vydzialacca tolki «ź pieraliku ŭčastkaŭ, pryznačanych dla nastupnaha vydzialeńnia inviestaram, arhanizacyjam dla budaŭnictva abjektaŭ, praduhledžanych zaklučanymi inviestycyjnymi dahavorami».
Praduhledžanaja pracedura konkursnaha adboru inviestara pry najaŭnaści dvuch i bolš inviestaraŭ, jakija pretendujuć na realizacyju inviestycyjnaha prajekta na adnym i tym ža ziamielnym učastku. Heta dazvolić «zabiaśpiečyć aptymalnaje i maksimalna efiektyŭnaje vykarystańnie ziamielnych resursaŭ».
Dekretam vyznačany šerah dadatkovych ilhot i prefierencyj dla inviestara. U ich liku prava na vyzvaleńnie ad upłaty niaŭstojki (štrafaŭ, pieni) za parušeńnie ŭmoŭ inviestycyjnaha dahavora, a taksama na davańnie rasterminoŭki (adterminoŭki) upłaty hetych płaciažoŭ z ulikam stupieni hatoŭnaści abjekta, praduhledžanaha inviestycyjnym dahavoram, i abjomu ŭkładzienych inviestycyj.
Praduhledžanyja šerah ilhot i prefierencyj dla padradčyka, raspracoŭščyka prajektnaj dakumientacyi, vyznačanych inviestaram. U pryvatnaści, jany vyzvalajucca ad upłaty dziaržaŭnaj pošliny za vydaču (praciah terminu dziejańnia) dazvołaŭ na pryciahnieńnie zamiežnaj rabočaj siły, śpiecyjalnych dazvołaŭ na prava zaniatku pracoŭnaj dziejnaściu ŭ krainie. Zamiežnyja hramadzianie i asoby biez hramadzianstva, jakija pryciahvajucca dla realizacyi inviestycyjnaha prajekta, vyzvalajucca ad upłaty dziaržaŭnaj pošliny za vydaču (praciah terminu dziejańnia) dazvołaŭ na časovaje pražyvańnie ŭ Biełarusi.
«Asablivaja ŭvaha» ŭ dekrecie nadadzienaja pytańniam kampiensacyi inviestaram ilhot, prefierencyj u vypadku nievykanańnia, nienaležnaha vykanańnia ŭmoŭ inviestycyjnaha dahavora, mahčymaści vyzvaleńnia, rasterminoŭki (adterminoŭki) upłaty niaŭstojki (štrafu, pieni) za parušeńnie inviestaram umoŭ inviestycyjnaha dahavora.
Aprača taho, praduhledžvajecca, što da inviestara nie mohuć być vystaŭlenyja patrabavańni ab kampiensacyi sumy lhot, prefierencyj i ab upłacie niaŭstojki (štrafu, pieni) u vypadku parušeńnia terminaŭ i inšych umoŭ realizacyi inviestycyjnaha prajekta ŭ suviazi ź niezakonnymi dziejańniami (biaździejańniem) słužbovych asob dziaržaŭnaha orhana ci vykankama, jakija zaklučyli inviestycyjny dahavor, inšaha dziaržaŭnaha orhana (arhanizacyi) pry adsutnaści viny inviestara i (abo) arhanizacyi.
Pry raspracoŭcy prajekta dekreta byŭ praanalizavany vopyt realizacyi inviestycyjnych prajektaŭ pa zaklučanych ź Biełaruśsiu inviestdahavorach, uziatyja pad uvahu prapanovy, nakiravanyja zacikaŭlenymi dziaržaŭnymi orhanami, inviestarami, biźnies-supolnaściu, śćviardžajecca ŭ paviedamleńni pres-słužby prezidenta.
Vydańnie dekreta «abumoŭlena nieabchodnaściu ŭdaskanaleńnia paradku zaklučeńnia, źmianieńnia, spynieńnia inviestycyjnych dahavoraŭ ź Biełaruśsiu, miechanizmu davańnia inviestaram ilhot, prefierencyj, udakładnieńnia ich pieraliku, a taksama mier adkaznaści inviestara pry parušeńni ŭmoŭ inviestycyjnaha dahavora».
