Nacyjanalny bank abiacaje dapamahčy likvidnaściu bankam, jakija sutyknucca z adtokam układaŭ paśla nabyćcia mocy dekretam prezidenta № 7 «Ab pryciahnieńni hrašovych srodkaŭ va ŭkłady (depazity)». Takoje abiacańnie rehulatar daŭ na minułym tydni padčas narady ŭ Nacbanku z udziełam kamiercyjnych bankaŭ.
Bankam było rekamiendavana addavać depazity biez vahańniaŭ pa patrabavańni klijentaŭ, paviedamiŭ ekśpiert, znajomy z vynikami narady. «Pry hetym rehulatar rekamiendavaŭ maksimalna chutka vyvieści na rynak biezadzyŭnyja ŭkłady. Taksama Nacbank davioŭ da bankaŭ rekamiendacyju źnižać staŭki pa adzyŭnych depazitach, i banki ŭžo heta zrabili», — skazała krynica.
Dekret № 7, jaki nabyŭ moc 12 listapada, uvodzić dva novyja vidy ŭkładaŭ — adzyŭnyja (jany praduhledžvajuć daterminovaje źniaćcie ŭkładu) i biezadzyŭnyja, jakija praduhledžvajuć, što hrašovyja srodki znachodziacca ŭ banku ŭvieś pieryjad raźmiaščeńnia terminovaha depazitu.
U toj ža dzień na pres-kanfierencyi ŭ Minsku pieršy namieśnik staršyni praŭleńnia Nacyjanalnaha banka Taras Nadolny zajaviŭ, što Nacbank dapuskaje adtok bankaŭskich układaŭ na pieršym etapie dziejańnia dekreta. «Biezumoŭna, luboje novaŭviadzieńnie na finansavym rynku zaŭsiody ŭsprymajecca krytyčna. Chutčej za ŭsio, na pieršym etapie peŭnaja častka ludziej układy budzie zabirać», — skazaŭ jon.
Amal usie viadučyja banki abjavili na minułym tydni ab vyvadzie na rynak novych bankaŭskich praduktaŭ (biezadzyŭnyja i adzyŭnyja depazity).
Bankiry pakul nie mohuć skazać, jakija ŭkłady buduć karystacca popytam, a jakija nie.
«Zaraz banki ŭ stanie ŭvachodu na novy nieviadomy raniej markietynhavym słužbam rynak układaŭ», — zaznačyŭ u razmovie z karespandentam BiełaPAN top-mieniedžar adnaho z bankaŭ.
Na dumku bankiraŭ, depazitnyja pradukty, jakija buduć vybirać układčyki, buduć zaležać ad dyfierencyjacyi stavak pa ich. Nacbank, nahadajem, anansavaŭ, što staŭki pa adzyŭnych układach mohuć skłaścisia ŭ kalidory 20-25%, pa biezadzyŭnych — u rajonie 25-30%.
«Kali banki ŭstanoviać pa biezadzyŭnym układzie staŭku 26% hadavych, a pa adzyŭnych 25%, to 1 pracentny punkt naŭrad ci stanie toj kaštoŭnaściu dla ŭkładčykaŭ, kab pazbavicca prava daterminovaha źniaćcia depazitu», — miarkuje ekśpiert.
Bankiry taksama miarkujuć, što kali Nacbank prymusić banki mieć u depazitnym partfieli bolš biezadzyŭnych układaŭ, čym adzyŭnych, udzielniki rynku stanuć ustanaŭlivać značny spred (roźnica pamiž canoj kupli i canoj prodažu) pamiž staŭkami pa adzyŭnych i biezadzyŭnych układach.
