Niadaŭna baćki majho muža pierajechali ŭ Izrail.
Ludzi va ŭzroście kala 60 hadoŭ uźnialisia ź miesca, spakavali pažytki — i palacieli ŭ krainu, dzie im treba vučyć movu, šukać, dzie najbližejšy supiermarkiet, i raźbiracca, jak płacić za śviatło i vadu.
Ale ja krychu nie pra heta.
Kali jany prylacieli, u pieršy ž viečar jany ŭručyli nam padarunki: cialniaški z nadpisam «Adesa», upryhažeńni dla mianie, usialakuju drobiaź.
Nam — darosłym ajcišnikam, jakija žyvuć u Izraili, jany, piensijaniery, jakija prylacieli z Ukrainy, — pryvieźli padarunki.
Na Novy hod da nas jašče prylacić i maja mama — z Kryma, durnym maršrutam praz Maskvu: bolš za tysiaču kiłamietraŭ na poŭnač, potym 2,6 tysiačy kiłamietraŭ na poŭdzień.
I voś jana pytajecca: dzieci, ja zvaryła vareńnia ź piersikaŭ, vam pryvieźci paru słoikaŭ?
Za try z hakam tysiačy kiłamietraŭ jana hatovaja vieźci hetyja paru słoikaŭ, u bahažy, dzie padlik vahi da hrama, i navat nie praz patrabavańni avijakampanii, a tamu što ŭ jaje balić śpina.
Pakaleńnie našych baćkoŭ možna łajać za mnohaje, ale jość u ich adna kranalnaja rysa: jany horača chočuć dać dzieciam usio, što mohuć. Usio, što ŭ ich jość: ad słoika piersikavaha vareńnia da hrošaj na kuplu kvatery. Napakavać synu-studentu sumku praduktami, padkinuć darosłaj dačce da Novaha hoda miech bulby i paŭkabana, 20 hadoŭ stajać u čarzie na kvateru, kab padaryć jaje dzieciam.
Heta žadańnie moža razraścisia da vyrodlivych maštabaŭ — i tady maleńkich dziaciej zakormlivajuć da rasstrojstva žyvata, a darosłych abibokaŭ utrymlivajuć na ścipłuju piensiju, admaŭlajučy sabie va ŭsim, akramia chleba, vady i adzieńnia z sekanda.
Ale ŭ narmalnych ramkach — heta altruizm čysty, kranalny i hodny vialikaj pavahi.
U śviecie nie tak šmat ludziej, jakija chočuć zaŭsiody nam dapamahać, tamu što vielmi nas lubiać.
I nie treba chichikać sa słoika vareńnia i prasmalenaha ščacinistaha paŭkabančyka, navat kali vy ŭžo vyraśli i zarablajecie stolki, što možacie kupić sabie ŭsio vareńnie ŭ śviecie.
HETAHA vareńnia vy ŭsio roŭna nie kupicie ni za jakija hrošy. Jano sałodkaje, jak u dziacinstvie, dzie zdymajuć pienku z čaroŭnaha varyva ŭ miednym tazie.
Prymicie hetyja dary vieščunoŭ.
Z udziačnaściu i zachapleńniem.
* * *
Darja Kastenka — biełaruska, jakaja razam z mužam emihravała ŭ Izrail z Rasii, paśla taho jak Rasija raspačała vajnu va Ukrainie. Žyvie ŭ Chajfie. Darja viadomaja pa hulni «Što? Dzie? Kali?». Jana stała znakamitaja taksama svaim dziońnikam z Płoščy-2006.
