«Isłamskaja dziaržava» apublikavała fatahrafiju vybuchovaha prystasavańnia, zakładzienaha ŭ rasijski samalot A321. Na fota pakazana blašanka abjomam 0,33. Paćvierdžańniaŭ, što heta taja samaja vybuchoŭka, niama.
Na fatahrafii vidać, što vybuchovaje rečyva znachodziłasia ŭ blašancy z-pad hazavanaj vady Schweppes. Zdymak apublikavany ŭ apošnim vypusku vydavanaha «Isłamskaj dziaržavaj» anhłamoŭnaha anłajn-časopisa Dabiq.
U tekście havorycca, što džychadysty pranieśli vybuchoŭku na bort rasijskaha łajniera, vyjaviŭšy słabyja miescy ŭ sistemie biaśpieki aeraporta Šarm-eš-Šejcha.
Pa słovach bajevikoŭ, pieršapačatkova jany płanavali padarvać zachodni samalot, adnak paśla pačatku rasijskaj vajennaj kampanii ŭ Siryi pieradumali.
Raniej hazieta «Kommiersant» sa spasyłkaj na blizkija da rasijskaha śledstva krynicy paviedamiła, što, pa papiarednich dadzienych, vybuch na borcie samalota A321 adbyŭsia nie ŭ bahažnym adździaleńni, a ŭ samim sałonie.
Surazmoŭcy vydańnia zajavili, što sapraŭdy ŭstalavać typ vybuchovaha prystasavańnia pakul nie ŭdałosia, ale nie vyklučana, što jon byŭ zroblena na asnovie płastytu abo tratyłu, jakija zvyčajna vykarystoŭvajucca ŭ vajennych metach.
Aficyjnaha paćvierdžańnia abo abviaržeńnia apublikavanaj hazietaj infarmacyi pakul nie pastupała. Adnak jašče ŭ aŭtorak FSB paćvierdziła, što pryčynaj avijakatastrofy staŭ vybuch na borcie samalota.
