Vodpusk pa dohladzie dziciaci na praciahu troch hadoŭ — marnatraŭstva, zajaviła sustaršynia Biełaruskaha sajuza žančyn, były ministr pracy i sacyjalnaj abarony Antanina Morava 26 listapada ŭ Minsku na mižnarodnaj kanfierencyi «Sacyjalnaja abarona i zdaroŭje asoby ŭ kantekście realizacyi pravoŭ čałavieka: navuka, adukacyja, praktyka».
BiełTA
Pavodle jaje słoŭ, «heta vielmi vialiki pieryjad», i Biełaruś źjaŭlajecca adzinaj krainaj z takim praciahłym apłačvajemym vodpuskam pa dohladzie dziciaci. Morava zaznačyła, što ŭ Rasii dapamoha pa dohladzie dziciaci płacicca ŭ poŭnym abjomie tolki na praciahu paŭtara hadoŭ z dnia naradžeńnia dziciaci.
U Biełarusi štomiesiac dapamoha pa dohladzie dziciaci va ŭzroście da troch hadoŭ składaje 35-45% siaredniamiesiačnaj zarpłaty rabotnikaŭ. Zaraz pamier dapamohi składaje 2,23-2, 87 młn. rubloŭ. Pamier dapamohi bolšy na dziaciej, jakija narodžanyja druhimi, a taksama majuć invalidnaść.
Morava zaznačyła: «My, kali ja była ministram, pravodzili daśledavańnie, zhodna z vynikami jakoha kala 70% žančyn nie karystajucca pravam być u vodpusku try hady poŭnaściu. U ludziej elemientarna nie chapaje hrošaj. Žančyny vychodziać na pracu, tamu što bajacca jaje stracić. Im nieabchodna ŭvajści ŭ pracoŭny praces, bo zaraz usio mianiajecca: my pierajšli na novyja technałohii, novyja sposaby ŭzajemadziejańnia na pracy».
Havoračy pra demahrafičnuju situacyju, Morava skazała, što dziejsnym miechanizmam padtrymki siamji źjaŭlajecca ŭkładańnie srodkaŭ u raźvićcio siamiejnaj infrastruktury (nabor sacyjalnych pasłuh, jakaść abuładkavańnia žyłoha, prafiesijnaha i sacyjakulturnaha asiarodździa).
Morava nie ličyć, što zaraz nazirajecca kryzis siamji. Na jaje dumku, adbyvajecca naturalnaja transfarmacyja. «Šmatdzietnyja siemji sustrakalisia čaściej, kali byli ekanamična vyhadnyja, tamu što pry ahrarnym układzie hramadstva čym u siamji bolš było dziaciej, tym bolš paśpiachovaja siamja», — zaznačyła jana.
