Mahčymaść pierakryćcia Turcyjaj Čarnamorskich pralivaŭ dla rasijskich sudoŭ u Kramli nazvali apakaliptyčnym scenaram.
Maskva prosić ustrymacca ad abmierkavańnia takoj situacyi. Pra heta pres-sakratar prezidenta Rasii Dźmitryj Piaskoŭ zajaviŭ u efiry teleprahramy «Viestki ŭ subotu», pieradaje sajt «Viesti».
«Vy budujecie absalutna apakaliptyčnyja scenary. Z našaha punktu hledžańnia, stupień pradkazalnaści dziejańniaŭ tureckaha kiraŭnictva ciapier vyznačajecca ź ciažkaściu. Davajcie navat nie budziem abmiarkoŭvać takija scenary», — zajaviŭ čynoŭnik, adkazvajučy na pytańnie žurnalista ab mahčymaści pierakryćcia Basfora i Dardaneł.
Čarnamorskija pralivy Basfor i Dardaneły majuć važnaje łahistyčnaje značeńnie ŭ materyjalna-techničnym zabieśpiačeńni apieracyi Pavietrana-kaśmičnych sił Rasii ŭ Siryi. Praviły marskoha sudnachodstva praz hetyja pralivy rehulujucca mižnarodnym pravam — kanviencyjaj Mantre, jakaja zamacavała suvierenitet Turcyi nad pralivami, pry hetym harantavaŭšy asablivyja pravy čarnamorskich dziaržaŭ nakont ich vykarystańnia.
Ankara maje prava na zakryćcio pralivaŭ tolki ŭ vypadku aficyjna abvieščanaj joj vajny.
