Homielski abłasny sud na vyjaznym pasiadžeńni ŭ Rečycy 30 listapada pačaŭ razhlad kryminalnaj spravy ŭ dačynieńni da dvuch miascovych žycharoŭ, jakija abvinavačvajucca ŭ arhanizacyi i zabojstvie 34-hadovaj žančyny.
Abvinavačany ŭ arhanizacyi zabojstva žančyny — jaje muž 1969 hoda naradžeńnia, vykanaŭca — brat pieršaj žonki zamoŭcy. Žančyna, jakaja znachodziłasia ŭ dekretnym adpačynku pa dohladzie dziciaci (jaje synu na momant zabojstva było dva hady), była zabitaja ŭ dvary svajho doma 16 krasavika. Jana pamierła ad vostraj straty kryvi, achviary było naniesiena 14 udaraŭ nažom u vobłaść šyi, hrudnoj kletki, unutranych orhanaŭ.
Zhodna z abvinavačańniem mužčyna pryniaŭ rašeńnie zabić žonku ŭ 2014 hodzie «z metaj dalejšaha materyjalnaha abahačeńnia i z metaj zavałodać domam». Učynić złačynstva jon prapanavaŭ znajomamu — bratu jaho pieršaj žonki. Toj zhadziŭsia pajści na złačynstva za 5 tysiač dalaraŭ. Razam z zamoŭcam byŭ raspracavany płan złačynstva, jaki abvinavačanyja sprabavali realizavać 9 krasavika. «Viktar pajechaŭ u hety dzień va Ukrainu, mnie addaŭ klučy ad bramki doma. Ja pavinien byŭ pačakać, pakul ich dačka pojdzie ŭ škołu, pryblizna a vośmaj ranicy, i ŭčynić zabojstva Vieraniki. Ja čakaŭ, ale dziaŭčynka ŭ škołu nie pajšła, i ja pajšoŭ damoŭ», — rastłumačyŭ na sudzie vykanaŭca.
Pavodle słoŭ abvinavačanaha, zabojstva «pieranieśli» na 16 krasavika. Vykanaŭca dačakaŭsia, pakul dziaŭčynka pojdzie ŭ škołu, zamoŭca taksama pajechaŭ pa spravach, daŭšy sihnał farami aŭtamabila abvinavačanamu. Toj zajšoŭ u dvor, pastukaŭ u akno, nazvaŭsia rabotnikam hazavaj słužby i paprasiŭ pakazać ličylnik, jaki byŭ za domam. Tam jon nakinuŭsia na achviaru z nažom i zabiŭ. Kab zymitavać abrabavańnie, sarvaŭ z šyi załaty łancužok i z ruki — załaty branzalet. Abvinavačany zajšoŭ u dom, dzie ŭ hety čas było dvuchhadovaje dzicia, i raskidaŭ rečy, kab «zabłytać ślady» i imitavać rabavańnie.
Zatym zamoŭca sustreŭsia ŭ vioscy Bronnaje z vykanaŭcam, pieradaŭ tysiaču dalaraŭ i daŭ abiacańnie astatniuju sumu addać paźniej.
Vykanaŭca zabojstva pracavaŭ u rytualnaj słužbie i na druhi dzień paśla zabojstva dastaŭlaŭ trunu ź ciełam zabitaj svajakam. «Što ja adčuvaŭ? Čamu ja pavinien štości adčuvać? Heta maja praca», — adkazaŭ abvinavačany na pytańnie paciarpiełaj, maci zabitaj.
Vykanaŭcu zabojstva vystaŭlenaje abvinavačańnie na padstavie artykułaŭ Kryminalnaha kodeksa «Zabojstva, učynienaje z asablivaj žorstkaściu, z karyślivych mierkavańniaŭ, pavodle najmu» i «Kradziež». Vinu jon pryznaje častkova i nie pryznaje, što zabivaŭ z asablivaj žorstkaściu. «Ja, moža, i žorstka dziejničaŭ, ale pakuty, jak začytali ŭ abvinavačańni, ja joj nie chacieŭ pryčyniać», — skazaŭ vykanaŭca. Admaŭlaje jon i kradziež, tamu što, pavodle jaho słoŭ, załatyja vyraby jon nie prysvoiŭ, a vykinuŭ.
Dziejańni muža paciarpiełaj kvalifikavanyja śledstvam na padstavie artykuła Kryminalnaha kodeksa «Arhanizacyja zabojstva z karyślivych mierkavańniaŭ, pavodle najmu». Jon poŭnaściu nie pryznaje svaju vinu.
