Z sajta Biełaruskaha dziaržaŭnaha ŭniviersiteta vydalenaja infarmacyja, źviazanaja z vystupleńniami studentaŭ suprać uviadzieńnia płatnaj pierazdačy zalikaŭ i ekzamienaŭ i za prava brać udzieł u pryniaćci rašeńniaŭ u VNU.
Ciapier ni na hałoŭnaj staroncy, ni ŭ archivie navinaŭ niama zvarotu rektara ad 24 listapada da studentaŭ, u jakim jon zaznačaje, što studenty i supracoŭniki BDU aburanyja sprobami pieravieści abmierkavańnie pytańnia ab uviadzieńni płaty za pierazdaču zalikaŭ i ekzamienaŭ z vyklučna adukacyjnaj i pravavoj u palityčnuju płoskaść.
Niama na sajcie BDU i infarmacyi ab zapłanavanaj na 2 śniežnia sustrečy rektara sa studentami, a taksama ab jaje admienie.
Nahadajem, 1 śniežnia aficyjny sajt BDU paviedamiŭ, što sustreča rektara Siarhieja Abłamiejki sa studentami VNU adbudziecca 2 śniežnia prykładna ŭ toj ža čas, kali aktyvisty ruchu «Studenty suprać» mierkavali pravieści marš studentaŭ u Minsku.
2 śniežnia źjaviłasia paviedamleńnie, što sustreča Abłamiejki sa studentami pieraniesienaja na niapeŭny termin. «U suviazi z zaklikami da supraćpraŭnych dziejańniaŭ i raspaŭsiudžvańniem infarmacyi ab mahčymych pravakacyjach, u metach biaśpieki studentaŭ BDU sustreča rektara BDU akademika Siarhieja Abłamiejki sa studentami pieranosicca», — havaryłasia na sajcie VNU.
Adkazvajučy na pytańnie, čamu z sajta BDU vydalenaja vyšejpieraličanaja infarmacyja, načalnik pres-słužby VNU Alena Marculevič paviedamiła, što hetyja naviny stracili aktualnaść.
«U nas jość inšyja naviny. My zaŭsiody pry źjaŭleńni bolš cikavaj naviny mianiajem paviedamleńni na hałoŭnych navinach», — skazała jana. Adkazvajučy na pytańnie, čamu mienavita hetaja infarmacyja vydalenaja z archiva, a inšaja za tyja ž daty zachavanaja, Marculevič skazała, što «jana nie vydalenaja, prosta nie bačnaja na sajcie».
Nahadajem, dniom 2 śniežnia ŭ rajonie staličnaj płoščy Niezaležnaści prajšoŭ marš «Luboŭ i spraviadlivaść», arhanizavany rucham «Studenty suprać». Svajoj akcyjaj studenty chacieli damahčysia ad kiraŭnictva BDU «admieny płatnych pierazdač i adpracovak», «spynieńnia nacisku na studentaŭ», «rospusku Asamblei BDU i stvareńnia novaha orhana studenckaha samakiravańnia».
