Kanfiskavanaja ŭ Biełarusi bujnaja partyja kantrafaktnaha ałkaholu moža być atrutnaj, paviedamiła staršy opierupaŭnavažany pa asabliva važnych spravach HUBEZ MUS Vieranika Paśmiećjeva.
Jak paviedamlałasia, u kancy listapada biełaruskija pravaachoŭniki spynili kanał pastaŭki i zbytu ŭ Biełarusi kantrafaktnaha ałkaholu z Rasii na Br1,2 młrd. «Hałoŭnaje ŭpraŭleńnie pa baraćbie z ekanamičnymi złačynstvami MUS Biełarusi nie vyklučaje suviaź zatrymanaj bujnoj partyi «šeraha» ałkaholu z kanfiskavanym rasijskimi kalehami surahatnym ałkaholem u Krasnajarskim krai, ad užyvańnia jakoha paciarpieli bolš za 40 čałaviek, 11 ź jakich zahinuli», — skazała Vieranika Paśmiećjeva.
Tady pravaachoŭnymi orhanami Rasii było vyjaŭlena, što atručvańni adbyvalisia z-za ŭžyvańnia padrobak viadomaha ałkaholnaha brenda Jack Daniels (taksama viadomy vypadak atručvańnia kańjakom «Lezhinka»). Ałkahol nielehalna (samatužnym sposabam) vyrablaŭsia na terytoryi Maskoŭskaj vobłaści, zatym praz łancužok pasrednikaŭ dastaŭlaŭsia ŭ rehijony Rasii, paśla čaho praź nielehalnyja internet-kramy i staronki sacyjalnych sietak raspaŭsiudžvaŭsia pa ŭtraja zanižanych koštach (košt vahaŭsia ad 300 da 700 rasijskich rubloŭ) siarod nasielnictva.
Śledčym kamitetam Rasii raspačata 8 kryminalnych spraŭ pa ŭkazanych faktach, zatrymana 4 asoby, jakija pryznanyja padazravanymi (usie — žychary Krasnajarska). Anałahičnyja vypadki atručvańnia zafiksavanyja ŭ Čuvašyi, Arenburhskaj, Maskoŭskaj, Kurskaj i Kałužskaj abłaściach. Rasspažyŭnahlad nakiravaŭ pazovy ŭ sudy z metaj zabłakavać bolš za 14 sajtaŭ, jakija handlujuć ałkaholem.
«U ciapierašni čas supracoŭniki padraździaleńniaŭ pa baraćbie z ekanamičnymi złačynstvami AUS Biełarusi pravodziać sumiesnuju pracu z kalehami AUS Rasii pa vyjaŭleńni asob, datyčnych da nielehalnaj vytvorčaści nazvanaj padakcyznaj ałkaholnaj pradukcyi i niezakonnaj realizacyi kantrafaktnaha ałkaholu na terytoryi Mytnaha sajuza. HUBEZ MUS prosić hramadzian być pilnymi, kab nie stać achviaraj machlaroŭ, nie nanieści škodu svajmu zdaroŭju, i nabyvać ałkaholnuju pradukcyju, markiravanuju akcyznymi markami Respubliki Biełaruś u śpiecyjalizavanych handlovych abjektach», — adznačyła Vieranika Paśmiećjeva.
