 |
Vyjšła ŭ śviet novaje relihijnaje vydańnie na biełaruskaj movie. Na hety raz, upieršyniu ŭ Biełarusi, Čatyrochevanhielle nadrukavana ŭ formie, pryznačanaj dla vykarystańnia pry bohasłužeńniach. Asablivaściu takoj formy źjaŭlajecca toje, što ŭvieś Evanhielski tekst, bieź nijakich skaračeńniaŭ ci źmienaŭ, padzialajecca na tak zvanyja začały: častki, jakija čytajucca na tym ci inšym bohasłužeńni, u zaležnaści ad dnia na praciahu liturhičnaha hodu albo ad nahody, dziela jakoj adpraŭlajecca bohasłužeńnie. Treba adznačyć, što takaja forma vydańnia zručnaja i dla tych viernikaŭ, jakija štodzień čytajuć Evanhielle ŭ adpaviednaści z carkoŭnym kalendarom.
U dadatkovym raździele pryviedzieny ŭkazańni Evanhielskich čytańniaŭ na praciahu hodu i pry peŭnych nahodach.
Pierakład čatyroch Evanhiellaŭ zrobleny Biblijnaj kamisijaj Biełaruskaj pravasłaŭnaj carkvy. Pryčym, u adroźnieńnie ad papiarednich vydańniaŭ pierakładaŭ Biblijnaj kamisii, u hetym vydańni praviedzienaja redakcyja pierakładaŭ, asabliva značnaja redakcyja pierakładu Evanhiella pavodle Matfieja.
Cikavymi dla čytačoŭ stanuć i pradmovy da kožnaha z čatyroch Dabravieściaŭ. Pakolki hetyja pradmovy pryniata drukavać tolki ŭ bohasłužbovych vydańniach na carkoŭna‑słavianskaj movie, dahetul jany nie byli dastupnymi šyrokamu kołu čytačoŭ. Źmiest ža pradmoŭ vielmi hłyboki i pavučalny. I kali pradmovy da troch apošnich Evanhiellaŭ užo drukavalisia raniej u vydańniach pierakładaŭ Biblijnaj kamisii, to pierakład pradmovy da Evanhiella pavodle Matfieja drukujecca ŭpieršyniu.
U cełym vydańnie «Śviaščennaha Evanhiella» stała jašče adnoj važnaj padziejaj jubilejnaha hodu pamiaci dabraviernaha kniazia Kanstancina (Vasilija) Astroskaha, jaki prasłaviŭsia pierš za ŭsio jak aśvietnik i abaronca Pravasłaŭja na ziemlach Vialikaha kniastva Litoŭskaha. Śviedčańniem hłybokaj pašany i ŭdziačnaści našamu słavutamu suajčyńniku stała pryśviačeńnie, źmieščanaje na tytule novaha vydańnia.
