Dziaržkammajomaść prapanoŭvaje patencyjalnym inviestaram placoŭku ŭ centry Minska — na terytoryi byłoha zavoda imia Ardžanikidze.
Jak zaznačajecca ŭ paviedamleńni Dziaržkammajomaści, terytoryja znachodzicca ŭ centralnaj častcy stalicy, u miežach vulic Jakuba Kołasa, Kulman, Viery Charužaj i prymykaje da hałoŭnaha praśpiekta stalicy — praśpiekta Niezaležnaści. Častka budynkaŭ byłoha pradpryjemstva, jakija vychodziać na płošču Jakuba Kołasa, źjaŭlajucca historyka-kulturnaj kaštoŭnaściu.
«Mierkavany ŭčastak znachodzicca ŭ niepasrednaj blizkaści ad stancyi mietrapalitena «Płošča Jakuba Kołasa» i prypynku aŭtobusaŭ, tralejbusaŭ, tramvajaŭ, što robić jaho raźmiaščeńnie vyklučna vyhadnym u dačynieńni da piešachodnaj i transpartnaj dastupnaści. Da taho ž inviestycyjny ŭčastak raźmiaščajecca na terytoryi, sumiežnaj z takimi bujnymi centrami pryciahnieńnia, jak Kamaroŭski rynak, CUM, Biełaruski nacyjanalny techničny ŭniviersitet i inšyja. Takim čynam, miescaraźmiaščeńnie ŭ horadzie robić inviestycyjnuju placoŭku vyhadnaj z punktu hledžańnia pryciahnieńnia naviedvalnikaŭ», — havorycca ŭ paviedamleńni Dziaržkammajomaści.
Kancepcyju rekanstrukcyi i pieraprafilavańnia terytoryi zavoda Ardžanikidze raspracavała UP «Minskhrada». Jana praduhledžvaje stvareńnie dvuch kompleksaŭ: handlova-zabaŭlalnaha i hramadska-dziełavoha z raźmiaščeńniem na jaho terytoryi fizkulturna-azdaraŭlenčych abjektaŭ. Terytoryja kvartała ŭ miežach prajektavańnia składaje 7,5 ha, fond hramadskaj zabudovy — 95 tys. kv. m ahulnaj płoščy. Pry hetym praduhledžvajecca budaŭnictva handlova-zabaŭlalnaha kompleksu aryjencirovačnaj płoščaj 25 tys. kv. m i hramadska-dziełavoha kompleksu — 24 tys. kv. m, jaki budzie ŭklučać fizkulturna-azdaraŭlenčyja abjekty płoščaj 16 tys. kv. m. Na terytoryi kompleksaŭ taksama praduhledžvajecca raźmiaščeńnie parkinhaŭ.
Hramadska-dziełavy kompleks prapanoŭvajecca raźmiaścić u hrupie novych budynkaŭ na miescy vytvorčych karpusoŭ i ŭ isnujučym korpusie № 3, jaki znachodzicca na rekanstrukcyi. Novy korpus kompleksu prapanoŭvajecca raździalić na mała- i siaredniepaviarchovyja abjomy z raźmiaščeńniem u ich fizkulturna-azdaraŭlenčych abjektaŭ i dźviuch šmatpaviarchovych viežaŭ ofisna-dziełavoha pryznačeńnia vyšynioj nie bolš za 90 m.
Praduhledžana, što handlova-zabaŭlalny kompleks budzie pradstaŭleny dvuma asobnymi mała- i siaredniepaviarchovymi budynkami, abjadnanymi halerejami. Vyšynia abmiežavanaja isnujučymi budynkami, što ŭvachodziać u histaryčnuju zabudovu płoščy Jakuba Kołasa. Transpartnaje absłuhoŭvańnie terytoryi płanujecca ažyćciaŭlać z vulic Jakuba Kołasa, Kulman i Viery Charužaj.
Kancepcyja rekanstrukcyi i pieraprafilavańnia terytoryi zavoda imia Ardžanikidze moža być skarektavanaja, zaznačyli ŭ kamitecie.
Nahadajem, raniej abjekty, jakija znachodziacca na hetaj terytoryi, vystaŭlalisia na aŭkcyjony, adnak ni adzin ź ich nie adbyŭsia z-za adsutnaści zajavak. Zaraz ułady spadziajucca znajści inviestara, hatovaha ŭkłaści srodki ŭ asvajeńnie placoŭki całkam.
