Ułady śćviardžajuć, što Biełaruś źjaŭlajecca adnoj z samych spakojnych i biaśpiečnych krain śvietu. Adnak hety tezis abviarhaje navat aficyjnaja statystyka. Hetak, zabojstvaŭ, u pieraliku na 100 tysiač nasielnictva, u Biełarusi ździajśniajecca až u 8 razoŭ bolš čym u Polščy!
Niadaŭna ŭ Biełarusi była abnarodavana statystyka naŭmysnych zabojstvaŭ, ździejśnienych u 2007 hodzie: za hety peryjad ich było 791. U paraŭnańni ź papiarednim hodam hetaja sumnaja ličba vyrasła, bo tady achviarami zabojstvaŭ stali 725 biełarusaŭ.
Usiaho, pavodle aficyjnych źviestak prakuratury Biełarusi, u 2006 hodzie było zarehistravana 946 zabojstvaŭ i zamachaŭ na zabojstva. Atrymlivajecca, što na 100 tysiač čałaviek u našaj krainie prypadała 9,68 takich złačynstvaŭ. Heta, pavodle źviestak AAN, vyvodzić Biełaruś u pieršyja pazycyi ŭ suśvietnym «rejtynhu» kryminahiennaści.
Chacia pakul nia ŭsie krainy abnarodavali svaje źviestki pa zabojstvach za 2006 i 2007 hady, usio ž možna pravieści niekatoryja paraŭnańni.
Praklaćcie vialikich krainaŭ
Lideram u nieviasiołym rejtynhu zastajecca Paŭdniovaja Afryka. U 2006 h na 100 tysiač čałaviek tam prypała 43,4 zabojstvy (ahulnaja ich kolkaść pieravysiła 19 tysiač). U paraŭnańni z papiarednimi hadami značna ŭzrasła kolkaść zabojstvaŭ i na Jamajcy. U 2006 h na 100 tysiač čałaviek tam prypadała kala 49 zabojstvaŭ. U suviazi z hetym eksperty paraŭnoŭvajuć kryminalnuju statystyku hetych krainaŭ z uzroŭniem złačynnaści ŭ haračych kropkach, dzie, da słova, kolkaść zabojstvaŭ na dolu nasielnictva časam navat mienšaja.
Nia raduje statystyka ŭ Brazylii. Tam na 100 tysiač čałaviek – 24,8 zabojstvaŭ.
Zabojstvy i śmiarotnaje pakarańnie
Značna mienšaja kolkaść zabojstvaŭ zafiksavana ŭ raźvitych susiedziaŭ. Da taho ž, kali vieryć aficyjnym źviestkam, z kožnym hodam hetaja kolkaść skaračajecca. U 2006 h u ZŠA na 100 tysiač čałaviek prypadała 5,7 zabojstvaŭ, u Kanadzie – 1,8. Pryčym najaŭnaść śmiarotnaha pakarańnia nijak nie kareluje z kolkaściu zabojstvaŭ. U bolšaści štataŭ ZŠA jano ŭžyvajecca, va ŭsich eŭrapiejskich krainach — skasavanaje. I ŭ Eŭropie kolkaść zabojstvaŭ na hałavu nižejšaja.
Zhodna z eŭrapiejskaj statystykaj za 2006 h, u Turcyi na 100 tysiač nasielnictva było ździejśniena 5,47 zabojstvaŭ, u Baŭharyi – 2,49, u Makiedonii – 2,19, u Finlandyi – 2,12.
Spakojnaja Eŭropa
U inšych krainach Eŭrasajuzu kolkaść zabojstvaŭ na 100 tysiač čałaviek nie pieravysiła dvuch. U vyniku, kolkaść bolš za adno i mienš za dva atrymali Rumynija (1,96), Luksemburh (1,8), Belhija (1,6), Kipr (1,78), Vuhorščyna (1,75), Słavakija (1,63), Charvatyja (1,6), Anhielščyna (1,48), Partuhalija (1,39), Francyja (1,38), Polšča (1,2), Hišpanija (1,175), Italija (1,14).
Roŭna «adzinka» atrymałasia ŭ Švecyi. Rekardsmenami ž pa samaj nizkaj kolkaści zabojstvaŭ u Eŭropa stali Niderlandy (0,96), Niamieččyna (0,88), Danija (0,82), Švajcaryja (0,79), Aŭstryja (0,73), Narvehija (0,71), Słavienija (0,59).
Anivodnaha zabojstva nie było zafiksavana na Malcie i ŭ Iślandyi, viadomych na ŭvieś śviet svajoj pryjaznaściu.
Krainy byłoha SSSR
Liderami u «zabojčym rejtynhu» ŭ Eŭropie źjaŭlajucca krainy byłoha SSSR.
U 2006 h u Rasiei było ździejśniena bolš za 27 tysiač zabojstvaŭ — na 100 tysiač nasielnictva naličvajecca 19,3. Za joj idzie Biełaruś (9,68). Dalej Estonija (8,85), Litva (8,4), Ukraina (6,9) i Łatvija (6,5).
Pa pryznańni A. Łukašenki, ad 2001 hodu kolkaść złačynstvaŭ u Biełarusi vyrasła na 70 %.
