Rašeńnie ab vydačy kredytaŭ banki prymajuć samastojna zychodziačy z acenki mnohich faktaraŭ, pry hetym źviestki z kredytnych historyj nie zaŭsiody možna ličyć vyznačalnym, paviedamiŭ žurnalistam načalnik upraŭleńnia «Kredytny rehistr» Nacbanka Viktar Plenkin.
«U kožnaha banka svaje praviły, i mienavita bank prymaje rašeńnie — davać kredyt abo nie davać. My možam tolki pryblizna skazać, što kali ŭ vašaj kredytnaj historyi rejtynh A abo V, to heta vielmi dobra. Adzinaje, što možna napeŭna skazać: pry rejtynhu D vydača kredytu pad vialikim pytańniem. Adnak nielha adnaznačna śćviardžać, što pry rejtynhu, naprykład, D1 nidzie nie daduć kredyt. Takoje rašeńnie prymaje niepasredna bank», — adznačyŭ Viktar Plenkin.
Namieśnik načalnika hałoŭnaha ŭpraŭleńnia raźvićcia ličbavych bankaŭskich technałohij Nacbanka Pavieł Zyl rastłumačyŭ, što banki raspracoŭvajuć patrabavańni dla kožnaha kredytnaha praduktu. Jak praviła, čym bolšy pamier kredytu (naprykład, na kuplu nieruchomaj majomaści), tym bolš žorstkija ŭmovy jaho atrymańnia.
«Kožny bank sam vyznačaje kryteryi dla acenki patencyjalnaha kredytaatrymalnika. Kredytny rejtynh — heta ahulnaja historyja taho, jak čałaviek vykonvaŭ svaje abaviazacielstvy ŭ minułym. Kredytny rehistr nie moža ŭpłyvać na kančatkovaje rašeńnie ab vydačy abo niavydačy kredytu, usio ž taki rašeńnie prymaje sam bank z ulikam vybranaha kredytnaha praduktu», — reziumavaŭ Pavieł Zyl.
U Biełarusi źjaviŭsia partał kredytnaha rehistra creditregister.by, dzie možna daviedacca ab svajoj kredytnaj historyi ŭ režymie anłajn. Siarod inšaj infarmacyi nazvany i kredytny rejtynh.
