Kiraŭnik inicyjatyŭnaj hrupy pa stvareńni sacyjalna-aśvietnaha hramadskaha abjadnańnia «Maciarynski ruch 328» Łarysa Žyhar źviarnułasia z adkrytym listom da Alaksandra Łukašenki z patrabavańniem «spynić chvalu katavańniaŭ» u dačynieńni da zatrymanych i asudžanych asob pa artykule za raspaŭsiudžvańnie narkotykaŭ, paviedamlaje pravaabarončy sajt spring96.org.
Padstavaj dla zvarotu staŭ incydent u turmie № 8 horada Žodzina, dzie 5 studzienia 20-hadovy Jahor Pratasienia sprabavaŭ ažyćciavić sprobu samahubstva.
Jak adznačajecca ŭ liście, u apošni čas u turmy traplaje šmat maładych ludziej, asudžanych za handal narkotykami. «Zatrymanyja jak «narkadylery» i «narkabarony» maładyja ludzi źviedvajuć katavańni, ździeki, pravakacyi z boku orhanaŭ pieraśledu. Psichika mnohich nie vytrymlivaje. Biełaruś zajmaje adno ź viadučych miescaŭ pa suicydzie», — piša aŭtar.
Sprobu samahubstva Pratasieni Łarysa Žyhar ličyć vynikam «samavolstva supracoŭnikaŭ narkakantrolu Salihorska». «Na praciahu vaśmi miesiacaŭ, znachodziačy ŭ turmie № 8 Žodzina, siedziačy ŭ kamiery-adzinočcy jon pisaŭ maci ab suicydzie. Ale jak heta prapuskaŭ cenzar? Čamu chłopiec siadzieŭ adzin?.. Čamu takim čynam našaj moładzi treba dakazvać, što jana maje racyju, a moža, i nievinavataja? Čamu ŭ našaj krainie vitajucca katavańni, źbivańni, nacisk i pravakacyi?» — zadaje pytańni aktyvistka.
Daśledčuju pravierku pa fakcie sproby samahubstva asudžanaha ŭ turmie pravodzić Žodzinski haradski adździeł Śledčaha kamiteta. Pavodle papiarednich źviestak SK, hramadzianin 1995 hoda naradžeńnia, asudžany sudom Salihorskaha rajona pa č. 3 art. 328 KK (raspaŭsiudžvańnie narkotykaŭ) na 14 hadoŭ pazbaŭleńnia voli, sprabavaŭ učynić samahubstva šlacham paviešańnia ŭ adzinočnaj kamiery. Sproba suicydu była spyniena supracoŭnikami turmy.
Ciapier maładomu čałavieku akazvajecca nieabchodnaja miedycynskaja dapamoha, paviedamiŭ SK. Pravodzicca kompleks mierapryjemstvaŭ, nakiravanych na vyśviatleńnie ŭsich akaličnaściaŭ zdareńnia, a taksama pryčyn i matyvaŭ, jakija vymusili asudžanaha da takich namieraŭ.
«Ruch maci 328» abjadnoŭvaje svajakoŭ hramadzian, asudžanych za raspaŭsiudžvańnie narkotykaŭ. Metaj inicyjatyvy źjaŭlajecca akazańnie materyjalnaj i psichałahičnaj dapamohi asudžanym i ich siemjam, a taksama ich infarmacyjnaja i jurydyčnaja padtrymka. Aktyvisty sprabavali zarehistravać arhanizacyju va ŭpraŭleńni justycyi Hrodzienskaha abłvykankama, ale atrymali admovu.
