Amal dva miesiacy tamu na staličnym čyhunačnym vakzale prajšło vielmi dziŭnaje zatrymańnie chłopca, jaki nibyta vajavaŭ u ATA. Mnohija spačatku paličyli, što abo zatrymanaha, abo abstaviny jahonaha zatrymańnia prosta «vydumali». Ale Śledčy kamitet paćviardžaje, što chłopiec znachodzicca pad vartaj, a praca pa kryminalnaj spravie idzie.
Nahadajem, što 26 kastryčnika minułaha hoda na minskim čyhunačnym vakzale zatrymali 28-hadovaha ŭradženca Viciebskaj vobłaści.
Śćviardžałasia, što padčas abychodu zały čakańnia patrulny milicyjant zaŭvažyŭ, što ŭ adnaho pasažyra z-pad rasšpilenaj kurtki vidać broniekamizelku. A pry nadhladzie ŭ chłopca vyjavili daviedku ab udziele ŭ bajavych dziejańniach na terytoryi Ukrainy, masku z prarezami dla vačej, dva pašparty, pistalet, samarobnaje vybuchovaje prystasavańnie — zarad ad aŭtamatyčnaha hranatamiota z ubudavanym vybuchoŭnikam ad ručnoj hranaty. A taksama — ściah «Pravaha siektaru». U dačynieńni da zatrymanaha raspačali kryminalnuju spravu za niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ.
Zatrymańnie vyhladała, miakka kažučy, padazronym — chto ŭ zdarovym rozumie budzie znachodzicca ŭ centry horada z takim «bahažom»? Tym bolš, nieŭzabavie stała viadoma, što ŭ taktyčnuju hrupu «Biełaruś», jakaja abjadnoŭvaje biełaruskich vajaroŭ Dobraachvotnickaha ŭkrainskaha korpusu «Pravaha siektaru» zatrymany nie ŭvachodziŭ. Vykazvalisia dumki, što zatrymańnie – śpiektakl dla publiki.
Ale zatym žurnalistam stała viadoma, što chłopiec sapraŭdy vajavaŭ na Danbasie pad pazyŭnym «Druh Duk», ale nie razam ź biełarusami. Znajšli bajcoŭ ATA, jakija apaznali na zdymku maładziona-biełarusa, zatrymanaha Śledčym kamitetam, i apisali jaho jak čałavieka, u jakoha byli prablemy sa zdarovym hłuzdam: «Psich, poŭny nieadekvat». Jany ž paćvierdzili, što biełarus sapraŭdy byŭ čalcom «Pravaha siektaru» i ŭdzielničaŭ u bajavych dziejańniach. Bajcy ATA nieaficyjna paćviardžajuć, što z aściarohaj stavilisia da hetaha maładziona, bo jon vielmi časta vyjazdžaŭ u Biełaruś.
Toj samy «Druh Duk»
Dalejšy jaho los pakul nieviadomy. U Śledčym kamitecie zajavili, što rasśledavańnie kryminalnaj spravy praciahvajecca.
«U ciapierašni čas ažyćciaŭlajecca praviadzieńnie stacyjanarnaj kompleksnaj psichołaha-psichijatryčnaj ekśpiertyzy abvinavačanaha, pravodzicca rabota pa ŭstalavańni i fiksacyi ŭsich abstavinaŭ, jakija majuć dokaznaje značeńnie pa kryminalnaj spravie. Varta adznačyć, što da hetaha momantu śledstvam praviedzieny vialiki abjom pracy pa vyznačeńni abstavinaŭ ździajśnieńnia złačynstva, — paviedamiła Julija Hančarova, aficyjny pradstaŭnik SK Respubliki Biełaruś. — Pa vynikach ekśpiertyzy, a taksama na padstavie atrymanych śledstvam dadzienych buduć prymacca dalejšyja pracesualnyja rašeńni, ab jakich my prainfarmujem».
Nijakich kankretnych źviestak pra chod spravy pakul nie ahučvajuć.
«Heta ŭsia infarmacyja, jakaja moža być ahučana na dadzieny momant», — padkreśliła Hančarova.
