Pryblizna 500 indyvidualnych pradprymalnikaŭ sabralisia 18 studzienia na stychijny mitynh kala budynka Homielskaha abłvykankama na praśpiekcie Lenina. Akcyja pačałasia prykładna ŭ 16.00. Jaje ŭdzielniki skandavali: «Dajcie nam pracu!»
Tut i nižej fota: BiełaPAN
U abłvykankamie prajšła narada rabočaj hrupy z udziełam pradstaŭnikoŭ indyvidualnych pradprymalnikaŭ, jakija handlujuć na rynkach vobłaści, i padatkovaj słužby pa pytańniach pracy IP sioleta.
Da ŭdzielnikaŭ mitynhu vyjšła načalnik kamiteta ekanomiki abłvykankama Elvira Karnickaja, jakaja prapanavała prysutnym prajści ŭ zału Doma kultury «Junactva» dla pieramoŭ. Pradprymalniki rašuča admovilisia, rastłumačyŭšy heta tym, što jany 20 hadoŭ mierźli zimoj na marozie i ciapier niachaj načalnica ź imi taksama razmaŭlaje na marozie. U svaju čarhu Karnickaja zajaviła, što na vulicy nichto ź imi razmaŭlać nie budzie.
Praź niekatory čas da ich vyjšaŭ namieśnik staršyni abłvykankama Balasłaŭ Pirštuk i prapanavaŭ prajści dla pieramoŭ u DK. Prykładna pałova pradprymalnikaŭ nakiravalisia ŭ aktavuju zału Doma kultury, astatnija vyrašyli čakać vynikaŭ na hanku abłvykankama.
Adkryvajučy sustreču, Pirštuk padkreśliŭ, što zakony prymajuć parłamient i prezident, a na miescach ich možna tolki abmiarkoŭvać i vyłučać prapanovy.
Ad imia IP vystupiŭ člen savieta pradprymalnikaŭ rynku «Davydaŭski» Siarhiej Kałpakoŭ. «Ja čuŭ, što razmovy z nami nie budzie, što miadovyja hady zakončylisia. Chaču skazać, što miod karysny, ale pa čajnaj łyžcy, a kali šmat jeści, toje-sioje źlipniecca, jak u niekatorych u našaj dziaržavie, jakija prałabiravali hety ŭkaz, u tym liku pradstaŭniki bujnoha biźniesu. Voś ich treba lačyć ad miadovaj zaležnaści. Hetyja ludzi nie pavinny prymać zakony dla takich, jak my, drobnaha biźniesu. Heta ŭsio roŭna jak vaŭku davieryć achovu aviečak», — ličyć pradprymalnik.
Kałpakoŭ nahadaŭ, što ŭ vobłaści pracuje 28 tys. IP, i hetyja ludzi siońnia nie viedajuć, što rabić i kudy iści. «My ŭžo hod z vami na kručku, padatkovaja ŭžo hatova pryniać u abarot našu ŭsiu majomaść, a narod kudy dzieć? Ja nie suprać płacić padatki, ale kab heta było tak, kab potym nivodzin švondzier nie moh padyści i štości patrabavać. Ja ž nie lezu ŭ biełaruski biźnies — taki jak biełaruskija krevietki i biełaruskaja papaja», — zajaviŭ vystupoŭca, pramova jakoha była sustretaja apładysmientami.
Jon nahadaŭ pradstaŭnikam ułady pra haradskija prablemy, u tym liku ćvil na ścienach u pałatach dziciačaj balnicy, a taksama hniłuju homielskuju kaŭbasu i miascovych čynoŭnikaŭ, jakich za heta pasadzili. «Kali ludzi chočuć žyć i pracavać, navošta ich pazbaŭlać hetaha, kolki možna teraryzavać IP? U Minsku damovilisia ab spynieńni bajavych dziejańniaŭ va Ukrainie, a što, sa svaimi hramadzianami nielha damovicca?» — skazaŭ Kałpakoŭ.
Pieramovy ŭładaŭ i homielskich indyvidualnych pradprymalnikaŭ doŭžylisia bolš za dźvie hadziny i skončylisia stvareńniem inicyjatyŭnaj hrupy pa vyrašeńni prablemnych pytańniaŭ IP.
Prapanova stvaryć inicyjatyŭnuju hrupu pastupiła ad dyrektara Analityčnaha centra Sajuza jurydyčnych sił «Respublikanskaja kanfiederacyja pradprymalnictva» Anatola Źmitroviča. Pirštuk z dadzienaj prapanovaj pahadziŭsia i paabiacaŭ, što, jak tolki pradprymalniki padaduć śpis tych, chto ŭvojdzie ŭ hrupu, ułada na praciahu dvuch dzion dapoŭnić hety śpis pradstaŭnikami IMPZ, Dziaržstandarta, inšych viedamstvaŭ i pryznačyć sustreču.
«Chto vam skazaŭ, što my pa roznyja baki barykady? Prablemy małoha biznesu — naš hałaŭny bol. My za stvareńnie rabočaj hrupy. Zakanadaŭstva hnutkaje, pamyłki jość, davajcie ŭnosić važkija arhumienty. Padbiarycie ludziej, jakija padrychtavany, ŭmiejuć pracavać z dakumientami», — prapanavaŭ Pirštuk.
Pradprymalnik z rynku «Davydaŭski» Alaksiej Bajkoŭ ličyć, što admianić ukaz № 222 hetak ža lohka, jak i było jaho pryniać. «Dastatkova, kab adzin čałaviek pastupiŭsia svaim honaram. Ukaz byŭ pryniaty dla pieradziełu ekanamičnych patokaŭ, i ni Mytny sajuz, ni JeŭrAzES tut ni pry čym. Heta była tvorčaść dla roskvitu sietak. U nas adziny ryčah upłyvu — hrošy. My nie najmajem kileraŭ, nie chočam nijakich revalucyj. A nakolki patrebnyja hrošy — spytajem u piensijanieraŭ, kali jany nie atrymajuć piensij, bo kožny IP jak minimum dvuch piensijanieraŭ utrymlivaje «, — skazaŭ pradprymalnik.
«Ułada pramachnułasia, kali prezident zajaviŭ, što admieny ŭkaza nie budzie, paśla taho jak na forumie pradprymalniki skazali, što nie pojduć na płošču. Kali pryjdzie čas — vyjduć. Ale jašče par u katłach nie saśpieŭ. Prezident adčuŭ, što heta słabaść pradprymalnikaŭ, ale heta nie słabaść, a stałaść. Jaho vystupleńnie było jak vodapadzieł — byŭ pasiŭny pratest, a pačynajecca faza aktyŭnaha, i kudy jana vyjdzie — my sami nie viedajem», — adznačyŭ Źmitrovič.
