Najbližejšymi miesiacami inflacyja ŭ Biełarusi moža paskorycca, ličać analityki rasijskaha «Śbierbanka». Na ich dumku, rost spažyvieckich cen u krainie stanie vynikam rašeńniaŭ urada, pryniatych apošnimi tydniami.
Ekśpierty nahadvajuć, što pa vynikach 2015 hoda inflacyja ŭ Biełarusi skłała 12%, što dakładna supała z aficyjnym prahnozam sacyjalna-ekanamičnaha raźvićcia.
«Asnoŭnym faktaram źnižeńnia inflacyjnaha nacisku zastajecca pasłableńnie spažyvieckaha popytu. Usplosk spažyvieckaj aktyŭnaści zastaŭsia ŭ minułym, a mahčymaści dla padtrymki ŭnutranaha popytu ŭ biahučych umovach vielmi abmiežavanyja», — havorycca ŭ ekanamičnym ahladzie Centra makraekanamičnych daśledavańniaŭ rasijskaha «Śbierbanka».
Razam z tym najbližejšymi miesiacami ekśpierty čakajuć paskareńnia inflacyjnych pracesaŭ u Biełarusi i bačać dla takoha raźvićcia padziej dźvie pieradumovy.
«Pa-pieršaje, u kancy 2015 hoda nabyła moc pastanova Savieta ministraŭ ab čarhovaj indeksacyi subsidavanych dziaržavaj pasłuh ŽKH. U siarednim pavyšeńnie taryfaŭ pavinna skłaści kala 4%. Pa-druhoje, 11 studzienia ŭrad unios istotnyja źmieny ŭ śpis tavaraŭ, ceny na jakija rehulujucca dziaržavaj», — zaznačajuć analityki «Śbierbanka».
Na ich dumku, u vyniku taho, što dziaržava pierastanie kantralavać na pastajannaj asnovie ceny na chleb, miasa, jajki, małočnuju pradukcyju, soki i inšyja tavary, inflacyja moža paskorycca.
«Cenavaja libieralizacyja moža pryvieści da karekcyi dziejnych cen na ŭvieś pieralik tavaraŭ u bok ich pavieličeńnia, što, u svaju čarhu, adabjecca na ŭzroŭni spažyvieckaj inflacyi», — čakajuć analityki.
Aficyjny prahnoz na 2016 hod praduhledžvaje, što inflacyja ŭ krainie składzie 12%. Pavodle acenak Ministerstva ekanomiki, u vypadku zachavańnia nizkich cen na naftu inflacyja moža być vyšejšaj — 17-18%.