Hrošy na dapamohu biełarusam, što vajujuć za Ukrainu, źbirali siońnia ŭ Minsku praz dabračynny marafon «Dapamažy biełaruskamu sałdatu». Ludziam prapanavali nie prosta achviaravać niejkija sumy, a nabyć karciny. Svaje tvory dla aŭkcyjonu prapanavali aŭtar «Narodnaha albomu» Michał Aniempadystaŭ, Andruś Takindanh i Natałka Bordak. Ideja hetaha dabračynnaha aŭkcyjonu naležyć Źmitru Daškieviču.
«Sprava ŭ tym, što tyja dobraachvotniki, jakija vajujuć za niezaležnaść Ukrainy, ad ukrainskaj dziaržavy nie atrymlivajuć absalutna ničoha. Usio, što jany majuć, heta taja dapamoha, jakuju im akazvajuć vałanciory. Na froncie jany majuć i charčavańnie, i adzieńnie, ale kali vyjazdžajuć na ratacyju, to nie majuć hrošaj ni na toje, kab kvateru źniać, ni na charčavańnie. I časam vymušanyja vychodzić z płakatami da vialikich kram, kab takim čynam sabrać nieabchodnyja hrošy. Tak i naradziłasia ideja sabrać hrošy i dapamahčy chłopcam», — raspaviadaje Jeŭraradyjo Źmicier Daškievič.
I pryznajecca: kali pabačyŭ na ŭłasnyja vočy, ź jakimi prablemami sutykajucca biełaruskija dobraachvotniki va Ukrainie, pryniaŭ rašeńnie pieradać im 25% svajho zarobku — kala 250 umoŭnych adzinak. Što praŭda, kožny miesiac adličvać takuju sumu nie moža — treba i svaju siamju ŭtrymlivać. Tamu i vyrašyŭ zładzić taki voś aŭkcyjon. Pa słovach Źmitra, jak tolki ideja ahučvajecca praz fejsbuk, da jaho adrazu źviartajecca Michał Aniempadystaŭ i prapanoŭvaje dla aŭkcyjonu svaje karciny. Hetak ža sami prapanoŭvajuć svaje pracy Andruś Takindanh i Natałka Bordak.
Prachodzić dabračynny marafon va Upravie Partyi BNF. Siarod prysutnych — vałanciory z Ukrainy Volha Halčanka i Alaksandra Alošyna. Dziaŭčaty dapamahajuć najpierš mienavita dobraachvotnikam-biełarusam. Pa ich słovach, dapamoha chłopcam na froncie siońnia sapraŭdy vielmi patrebnaja.
«Paśla taho, jak zahinuŭ biełarus z pazyŭnym «Taras» — Aleś Čarkašyn, nam pieradali jaho broniekamizelku. Jana ŭ jaho była samaja prostaja: plita na hrudzi i plita na śpinu. Z pravaha boku hetaj broniekamizelki była dzirka – miesca, dzie prajšoŭ askiepak ad snarada. Kali b u jaho była inšaja broniekamizelka: z bakavymi płaścinami, z kieŭłaravym kaŭniarom, to całkam mahčyma, što jon i zaraz byŭ by žyvy. Adno — takaja ekipiroŭka kaštuje vialikich hrošaj, i nie zaŭždy jość mahčymaść ich sabrać i nabyć,toje, što sapraŭdy treba. «Tarasa» ŭžo nie viernieš, ale na froncie zastalisia inšyja chłopcy-biełarusy, jakich treba ekipiravać tak, kab takija situacyi bolš nie paŭtaralisia», — tłumačać Volha Halčanka i Alaksandra Alošyna nieabchodnaść takoha zboru hrošaj.
Z troch mastakoŭ, jakija prapanavali svaje karciny da dabračynnaha marafonu, na Upravu 24 studzienia pryjści atrymlivajecca tolki ŭ Natałka Bordak. Jana nie šmatsłoŭnaja.
«Našy chłopcy tam zmahajucca nie tolki za svabodu Ukrainy, ale i za našu z vami svabodu. Tamu davajcie dapamožam im čym zmožam», — zaklikaje mastačka.
I ludzi adhukajucca. Dźvie karciny Michała Aniempadystava nabyvajuć jašče da pačatku marafonu, jašče adnu — padčas jaho. Karcinu samoj Natałki Bordak nabyvaje niejki zamiežnik, što pryjšoŭ na Upravu ŭ supravadžeńni pierakładčyka.
Cikaŭlusia ŭ arhanizatara marafonu Źmitra Daškieviča, ci miesca na toj vajnie biełarusam, kali ŭkrainskaja dziaržava ich nie tolki nie zabiaśpiečvaje samym nieabchodnym – nie daje hramadzianstva i navat užo hučać słovy ad aficyjnych asob, što dapamoha zamiežnikaŭ Ukrainie patrebnaja.
«Jany dapamahajuć tam nie niejkim palityčnym siłam, prezidentam ci čynoŭnikam — jany dapamahajuć bratniamu narodu. I hety narod, u adroźnieńnie ad ułady, ich dapamohu cenić», — upeŭnieny Źmicier.
Daškieviča padtrymlivajuć Volha Halčanka i Alaksandra Alošyna. Pa słovach dziaŭčat, siońnia mienavita biełarusy najbolš aktyŭna dapamahajuć Ukrainie. I havorka nie tolki pra dapamohu vajennuju ad dobraachvotnikaŭ — biełarusy źbirajuć i pieradajuć va Ukrainu humanitarnuju dapamohu, hrošy, padtrymlivajuć maralna. I ŭkraincy, upeŭnivajuć vałanciory, heta sapraŭdy vielmi ceniać.
Pa słovach Daškieviča, mahčymaść nabyć karciny ci prosta achviaravać hrošy biełaruskim dobraachvotnikam va Ukrainie ŭ achvotnych budzie i nadalej — marafon praciahvajecca.
